पाँचथर – झापाको विर्ता युनाइटेडले फिदिममा जारी फाल्गुनन्द गोल्ड कप नक आउट फुटबल प्रतियोगिताको उपाधि जोगाउने अभियानको एक कदम अघि बढेको छ । ताप्लेजुङको मिसन युनाइटेड क्लबलाई ट्राइबेकरमा ४– २ ले हराउँदै विर्ता युनाइटेड क्वार्टरफाइनलमा पुगेको छ ।

विर्ताको जितमा गोलकिपर विशाल मुखिया नायक बने । अब विर्ताले सेमिफाइनल प्रवेशका लागि आयोजक फिदिम स्पोर्टिङ क्लबको सामना गर्ने छ । फिदिम माविको मैदामा आज भएको सेमिफाइनलको निर्धारित ९० मिनेटको खेल १–१ बराबरीमा टुंगिएपछि खेलको निर्णय पेनाल्टी सुटआउटबाट भएको थियो ।

ट्राइबेकरमा झापाका कर्ण लिम्बु ,दिलेन लोक्तम ,सुमित मैनाली र विकी चौधरीले गोल गरे । मिसनका विकास राई ,विकेश लिम्बुको प्रहार गोलमा परिणत भएको थियो । मिसनका तेनजिङ लामा र युवराज लिम्बुको प्रहार विर्ताका गोलकिपर विशालले जोगाएका थिए ।

खेलको चौथो मिनेटमा आषिश चापागाईको गोलबाट विर्ताले अग्रता लिएको थियो । विपक्षी गोलकिपर अघि बढेको मौका छोप्दै आशिषले गोल गरेका थिए । तर, अग्रता लामो समय टिकेन । १५ औं मिनेटमा मिसन ताप्लेजुङका विकेश लिम्बुले बराबरी गोल फर्काए ।

बराबरीपछि पनि विर्ताले दुई पटक सम्म गोलको अवसर पाएको थियो । तर सफल हुन सकेन । ७० औं मिनेटमा कर्णले वान भर्सेस वानमा गोल गर्न सकेनन् भने विर्ताका योगेश गुरुङको प्रहार विपक्षी गोलकिपरले रोके ।

अनुभवको कमीका कारण पराजित हुनु परेको मिसनका कप्तान खमिर गिल्सन कन्दवाले बताए । विर्ताका कप्तान नरेन लिम्बुले पटक पटकको अवसर गुमाउँदा जितका लागि पेनाल्टी सम्म कुर्नु परेको बताए । विर्ताका दिलेन खेलको म्यान अफ दी म्याच घोषित भए र उनले १० हजार रुपैयाँ प्राप्त गरे ।

नवौं संस्करणको फाल्गुनन्दको विजेताले उपाधि सहित ३ लाख र दोस्रो हुने टोलीले २ लाख रुपैयाँ प्राप्त गर्नेछ । प्रतियोगिताको उत्कृष्ट गोलकिपर, रक्षक , मिडफिल्डर , फरवार्डले समान १० हजार रुपैयाँ पाउनेछन् । सर्वोत्कृष्ट खेलाडीले मोटरसाइकल प्राप्त गर्नेछन् ।

फाल्गुनन्द गोल्ड कपमा आइतबारको खेल
एपिएफविरुद्ध सुनसनरी ११