काठमाडौं (हाम्रो खेलकुद)– लिटिल एन्जेल्स स्कुल हात्तिबनले २२ औं फादर मोरान ममोरियल फुटबल प्रतियोगिताको उपाधि जितेको छ । आयोजक सेन्ट जेभियर्स स्कुल गोदावरी एलाई आज ३–१ ले हराउँदै लिटिल एन्जेल्स च्याम्पियन बनेको हो ।

विजेता लिटेल एन्जेल्स टोलीका खेलाडी उपाधि र अतिथिका साथ ।

लिटिल एन्जेल्सका लागि भार्गव सिलवालले २ गोल गरे भने अर्को गोल लक्ष्य महर्जनले गरे । आयोजक टोलीका लागि अभिनव विष्टले गोल गरे ।
पाँचौं मिनेटमा गोल गर्दै अग्रता दिलाएका भार्गले अर्को गोल २० औं मिनेटमा गरे । आयोजका अभिनवले ३० औं मिनेटमा गोल फर्काए । तर, लक्ष्यले ४० औं मिनेटमा गोल गरेपछि पुनः लिटिल एन्जेल्सले अग्रता फराकिलो बनाएको थियो ।

क्रेस्सेन्ट एकेडेमी अंग्रेजी स्कुल गोदावरी प्रतियोगितामा तेस्रो भयो । तेस्रो स्थानको खेलमा क्रेस्सेन्टले झापाको मोरान मेमोरियल स्कुललाई ३–१ ले हरायो । विजयी टोलीका लागि पुष्पक राईले दोस्रो शोभाकर रोकायाले ३६ औं र मोहित तामाङले ४७ औं मिनेटमा गोल गरे । मोरानका लागि गंगाराम राजवंशीले ४० औं मिनेटमा गोल फर्काए । मोरान प्रतियोगिताको फेयर प्ले टोली घोषित भयो ।

आयोजक टोलीका सुभम सिलवाल उत्कृष्ट गोलपिकर, क्रेस्सेन्टका मोहित तामाङ उत्कृष्ट रक्षक, मोरानका बुधहरी हस्दा उदयमान खेलाडी घोषित भए । भार्गव सिलवाल प्रतियोगिताका सर्वाधिक गोलकर्ता बने भने नेपाल डन बोस्कोका निश्चल केसी उत्कृष्ट खेलाडी घोषित भए । लिटिल एन्जल्सका राजेन्द्र कार्की उत्कृष्ट प्रशिक्षक घोषित भए । प्रतियोगितामा १५ टोलीको सहभागिता थियो ।