काठमाडौँ (हाम्रोखेलकुद)- चेल्सी फुटबल क्लबको नेपालस्थित आधिकारिक समर्थकहरुको समुह चेल्सी नेपालले यहि जनवरी २० तारिखमा ललितपुरको झम्सीखेलस्थित स्पोर्ट्स हाईव बारमा चेल्सी कार्निभल गर्ने भएको छ।
चेल्सी नेपालले आफुले समर्थन गर्ने क्लबलाई स्थानिय स्तरमा प्रबद्दन गर्नको लागि कार्यक्रम आयोजना गर्न लागेको जानकारी दिएको छ। संस्थागत रुपमा नेपालकै पहिलो फ्यान क्लब चेल्सी नेपालले नियमित यस प्रकारको कार्यक्रम गर्दै आएको छ र त्यसैलाई निरन्तरता दिन लागेको क्लबका सचिव सलिल प्रसाद श्रेष्ठले जानकारी दिए। श्रेष्ठ भन्छन्,’ बिगतमा हामीले धेरै कार्यक्रम गरेपनि कार्निभल भनेर गर्न लागेको पहिलो पटक हो र यो कार्यक्रम बारे चेल्सी क्लबलाई पनि हामीले ध्यानकर्षण गराइसकेका छौं।’
कार्निभलमा चेल्सी सम्बन्धि हाजिरी जवाफ प्रतियोगिता, विभिन्न मनोरन्जनात्मक खेल, लाइभ ब्याण्ड, वृतचित्र प्रदर्शनी र चेल्सीका पुराना खेलाडीसँग लाइभ भिडियो अन्तरक्रिया गर्ने कार्यक्रम रहेको छ। हाजिरी जवाफ र विभिन्न मनोरन्जनात्मक खेलको बिजेताहरुले आकर्षक पुरस्कार प्राप्त गर्ने कार्यक्रम संयोजक अजित ताम्राकारले बताए।
