धनगढी (हाम्रो खेलकुद) – नेपाल आइस सुदूरपश्चिम खप्तड गोल्ड कपको दोस्रो संस्करणको दोस्रो सेमिफाइनलमा नेपाल एपिएफ र सुदूरपश्चिम ११ भिड्दै छन् । पहिलो हाफमा दुवै टोलीले गोल गर्न सकेका छैन ।
पहिलो हाफमा दुवै टोलीले गोल गर्ने केही प्रयास गरेपनि दुवैतर्फबाट सशक्त प्रयास भने भएको छैन । खेलको २४ औं मिनेटमा राम सिंह राणाले आयोजक सुदूरपश्चिमलाई अग्रता दिलाउन मौका खेर फालेका थिए । डि बक्सबाट उनको प्रहार आकाशीएको थियो । त्यस्तै एपिएफमा श्याम नेपालीले ३० औं मिनेटमा बक्स बाहिरबाट गोल गर्न प्रयास गरे पनि उनको फितलो प्रहारले बिपक्षी गोल किपर अमानात शेखलाई दुख दिएन ।
एपिएफका नवीन नेपालले ३४ औं मिनेटमा बक्स बाहिरबाट गरेको राम्रो प्रहारलाई अमानातले पन्च गरेका थिए । एपिएफका राजेन्द्र रावलले ४१ औं मिनेटमा लामो दूरीबाट गोल गर्ने प्रयास गरेपनि उनको प्रहारलाई अमानातले पन्च गर्दै गोल हुन् दिएनन् ।
नेपाल आइस सुदूरपश्चिम खप्तड गोल्ड कपको पहिलो संस्करणमा पहिलो खेलबाट बाहिरिएको नेपाल आर्मीले यसपटक भने सेमिफाइनलमा मनाङलाई हराउँदै फाइनलको यात्रा तय गरिसकेको छ । एपिएफ र आयोजक सुदूरपश्चिम बीचको विजेताले सोमबार आर्मीसँग फाइनल खेल खेल्ने छ ।
