पोखरा (हाम्रो खेलकुद) – सातौं रन्जित गुरुङ स्मृती बगर भाइ खलक एट ए साइड अन्तर्राष्ट्रिय आमन्त्रण भेट्रान फुटबल प्रतियोगिताको पहिलो दिन फ्रिडम फाइटर काठमाडौं, बुटवल भेट्रान र एबिसी पोखरा विजयी भएका छन् ।
उद्घाटन खेलमा फ्रिडमले बुटवल सोसाइटीलाई १–० ले हराएको छ । विजयी टोलीका विजय गुरुङ खेलको म्यान अफ दी म्याच चुनिए । अर्को खेलमा बुटवल भेट्रानले हेम्जा भेट्रानलाई ३–१ ले पराजित गर्यो । बुटवलका सञ्जय श्रेष्ठले २ र शेर बहादुर गुरुङले १ गोल गरे । हेम्जाका सन्तमा श्रेष्ठले फर्काए । बुटवलका सञ्जय म्यान अफ दी म्याच घोषित भए ।
सञ्जय गुरुङको ह्याट्रिकको मद्दतमा एबिसी पोखराले आयोजक बगर भाई खलकलाई ५–२ ले हरायो । विजयी टोलीका सञ्जय खेलको म्यान अफ दी म्याच चुनिए । उद्घाटन अघि पूर्व राष्ट्रिय खेलाडी एवंम फुटब प्रशिक्षक डम्बर गुरुङलाई सम्मान गरिएको थियो ।
४० वर्ष देखि माथी ६५ वर्ष उमेरका खेलाडीको सहभागिता रहने प्रतियोगिताको विजेताले १ लाख, दोस्रो हुने टोलीले ५० हजार रुपैयाँ प्राप्त गर्नेछ । माघ ६ गते सम्म चल्ने प्रतियोगितामा भारतका दुईसहित २६ टोलीको सहभागिता रहनेछ ।
