काठमाडौं (हाम्रो खेलकुद)– दुई विभागिय टोली त्रिभुवन आर्मी क्लब र नेपाल पुलिस क्लब राखेप च्याम्पियनसिप अन्तर्गत २८ औं पुरुष राष्ट्रिय फुटबल प्रतियोगिताको सेमिफाइनलमा पुगेका छन् । प्रतियोगिताको पहिलो दिन अर्को विभागिय टोली एपिएफ क्लब र सुदूरपश्चिमाञ्चल अन्तिम चारमा पुगेका थिए ।
पुलिसका भोला सिलवाल । फाइल तस्बिर
दाङमा जारी फुटबल प्रतियोगितामा बुधबार आर्मीले पूर्वाञ्चललाई २–० ले हराएको थियो । दुई दिन पहिला नेपाल आइस सुदूरपश्चिम खप्तड गोल्ड कप फुटबल प्रतियोगिताको उपाधि जितेको आर्मीको जितमा १७ औं मिनेटमा विवेक बस्नेत र खेल सकिन २ मिनेट बाँकी रहँदा दीप लामाले गोल गरेका थिए ।
अर्को खेलमा पुलिसले पश्चिमाञ्चललाई ४–० ले हरायो । पुलिसका लागि सुमन लामाले २ तथा निरकुमार राई र भोला सिलावलले गोल गरे । २८ औ. मिनेटमा निरकुमारको गोलबाट अग्रता लिएको पुलिसका लागि सुमनले ३१ औं मिनेटमा गोल गरे ।
भोलाले ४३ औं मिनेटमा गोल गर्दा पुलिसले पहिलो हाफमा ३–० को अग्रता लियो । सुमनले ६४ औ. मिनेटमा अर्को गोल थपे ।नकआउट फुटबल प्रतियोगिताको सेमिफाइनलमा बिहिबार पुलिस र एपिएफ तथा आर्मी र सुदूरपश्चिमाञ्चलबीच प्रतिस्पर्धा हुने राखेपले जनाएको छ ।
