काठमाडौं (हाम्रो खेलकुद) – राखेप च्याम्पियनसिप अन्तर्गत फुटबल प्रतियोगिताको फाइनलमा आर्मीलाई हराउँदै पुलिसले उपाधि जितेको छ । घोराहीमा सम्पन्न नकआउट च्याम्पियनसिपमा आर्मीलाई टाई ब्रेकरमा ५-४ ले हराउँदै पुलिसले उपाधि जितेको हो ।

भरत खवास, नवयुग श्रेष्ठ लगायत पहिलो रोजाइका खेलाडी विना मैदानमा उत्रिएको आर्मीको ‘बी’ टीमले पुलिसलाई निर्धारित समयमा गोलरहित रोकेपछि खेलको नतिजा टाई ब्रेकरले तय गरेको थियो ।

टाई ब्रेकरमा पुलिसका सुमन लामा , बुद्ध लामा , तेज तामांग , दिनेश राजबंशी र निर कुमार राई गोल गरे भने आर्मीका राजिब गुरुङले गोल गरेनन् । आर्मीका जर्ज प्रिन्स कार्की , हिरन्य मगर , बिबेक बस्नेत र रुपेश केसीले गोल गरे ।

एपिएफ तेस्रो

तेस्रो स्थानको खेलमा एपिएफले सुदुरपश्चिमलाई टाई ब्रेकरमा नै हरायो । निर्धारित समय २-२ को बराबरीमा सकिएपछि खेलको छिनोफानो टाई ब्रेकरले गरेको थियो । एपिएफले पनि दोस्रो रोजाईको टोली उतारेको थियो । एपिएफको पहिलो टोली भने इटहरी गोल्ड कपमा थ्री स्टारसँग पराजित भयो ।

रोमाञ्चक खेलमा सुदुरले ३३ मिनेटमा मणि राम चौधरीको गोलमा अग्रता लिएपछि दोस्रो हाफमा ५५ औं मिनेटमा मनिष लामाले एपिएफलाई बराबरी गोल दिलाएका थिए । मणि रामले ६३ औं मिनेटमा सुदुरलाई दोस्रो पटक अग्रता दिलाए पनि आषिस लामाले खेलको अन्तिम मिनेटमा गोल गर्दै एपिएफलाई जोगाए ।

दुई गोल गरेका मणि रामले टाई ब्रेकरमा गोल गर्न असफल भएपछि सुदुर ४-३ ले पराजित भयो । सुदुरका प्रकाश हमाल , सुनिल धामी , राजन थागुनाले गोल गर्दा कृष्ण कथायतले भने गोल गरेनन् । एपिएफका दीपक खड्का चुके पनि आषिस, सन्तोष लामा , मान बहादुर लामा र सुमित आलेले गोल गरे ।