धनगढी (हाम्रो खेलकुद)– नेपाल आइस सुदूरपश्चिम खप्तड गोल्डकप फुटबल प्रतियोगितामा डेढ लाख रुपैयाँ भन्दा केही बढी घाटा भएको आयोजक सुदूरपश्चिम ११ स्पोर्टस क्लबले जानकारी दिएको छ ।
पुस २१ देखि माघ १ गते सम्म धनगढी रंगशालामा आयोजना भएको सर्वाधिक पुरस्कार राशी मध्येको एक खप्तड गोल्ड कपमा १ लाख ६५ हजार ५ सय १६ रुपैयाँ घाटा भएको आयव्यय सार्वजनिक गर्न मंगलबार आयोजित पत्रकार सम्मेलनमा क्लबका महासचिव प्रकाश शाहीले जानकारी दिए ।
२२ लाख रुपैयाँ मात्र पुरस्कार राशीमा खर्च भएको प्रतियोगितामा ९१ लाख रुपैयाँ खर्च भएको जनाएको छ । विभिन्न ३७ शीर्षकमा ८९ लाख ३४ हजार ३ सय ८४ रुपैयाँ आम्दानी भएको जनाइएको । प्रतियोगिताको मुख्य प्रायोजक सिजी ग्रुपले २० लाख रुपैयाँ प्रायोजन गरेको थियो भने टिकट विक्रीबाट १९ लाख रुपैयाँ आम्दानी भएको क्लबले जनाएको छ ।
त्यस्तै सह प्रायोजकका रुपमा नेपाल टेलिकम र जगदम्बा स्टिलले समान ४ लाख रुपैयाँ उपलब्ध गराएको बताइएको छ । त्यस्तै प्रतियोगितामा विभिन्न विभिन्न व्यापारिक प्रतिषन संघ, संस्थाले पनि सहयोग गरेको जनाइएको छ । १२ टोलीको सहभागिता रहेको प्रतियोगितामा टोलीको व्यवस्थापनमा मात्र साढे ३३ लाख रुपैयाँ खर्च भएको महासचिव शाहीले बताए ।
प्रतियोगिताको विजेताले ११ लाख ११ हजार १ सय ११ तथा दोस्रो हुने टोलीले ५ लाख ५५ हजार ५ सय ५५ रुपैयाँ प्राप्त गरेका थिए । सुदूरपश्चिम ११ ले अर्को वर्ष विजेतालाई २१ लाख र दोस्रो हुने टोलीलाई १० लाख ५० हजार रुपैयाँ दिने घोषणा गरिसकेको छ ।
सोही पत्रकार सम्मेलनमा आयोजकले फागुनको अन्त्यतिर सुदूरपश्चिम खप्तड महिला गोल्डकप फुटबल प्रतियोगिता आयोजना गर्ने बताएको छ । ६ स्वदेशी र २ विदेशी क्लबको सहभागिता रहने प्रतियोगिताको विजेताले ५ लाख र दोस्रो हुने टोलीले २ लाख ५० हजार रुपैयाँ प्राप्त गर्ने बताइएको छ ।
