काठमाडौं (हाम्रो खेलकुद) – रुस्लान थ्रीस्टारसँग इटहरी गोल्डकप जितेपछि हिरो आइ-लिग खेल्न भारत पुगेका नेपाली स्ट्राइकर विमल घर्ती मगरको टोली मोहन बगान अहिले चेन्नाई सिटीसँग भिड्दै छ ।

सिलोङ लाजोङविरुद्धको पहिलो खेलमा विमल इन्जुरी समयको दोस्रो मिनेटमा आएका थिए र एक प्रहार गर्ने अवसर पाए जुन विपक्षी गोलकिपरले बचाऊ गरेका थिए । आज चेन्नाई सिटीविरुद्ध चलिरहेको दोस्रो खेलमा पनि विमल बेन्चबाटै सुरुवात गरे । तर मोहन बगानका अजहरुदिन मलिकको साटो विमल खेलको ३४ औं मिनेटमा मैदान प्रवेश गरेका छन् ।

आई लिगमा हरेक टोलीले ६ विदेशी खेलाडिलाई टोलीमा राख्नु पर्ने हुन्छ । ती ६ खेलाडिमध्ये केवल ५ मात्र सुरुवाती ११ मा खेल्न पाउँछन् । विमल बाहेक मोहन बगानमा नाइजेरियाका इज किङ्सली, अष्ट्रेलियाका केमरुन वाटसन, जापानका युटा किनोवाकी, केमरुनका डिपान्डा डिका र लेबननका अक्रम मोघ्राबि छन् । यी पाँचै खेलाडि विमलको तुलनामा अन्तर्राष्ट्रिय स्तरमा प्रमाणित र अनुभवी खेलाडि रहेका छन् ।

त्यसैले विमल बेन्चबाट खेल सुरु गर्न बाध्य भएका हुन् । अहिले मोहन बगान चेन्नाई सिटीसँग पहिलो हाफको अन्त्यसम्म गोलरहित बराबरी खेल्दै छ । आजको खेल जिते मोहन बगान तालिकाको तेस्रो स्थानमा उक्लिने छ । दोस्रो हाफमा गोल गर्दै बाकिं सिजनको लागि छाप छोड्ने विमलसँग राम्रो मौका रहेको छ ।