विराटनगर (हाम्रो खेलकुद)– भारतको मोहम्मडन स्पोर्टिङ क्लब कोलकातालाई आइतबार पाखा लगाउँदै सिएमजी संकटा क्लब काठमाडौं विराटनगरमा जारी विराट गोल्डकप फुटबल प्रतियोगिताको क्वार्टरफाइनलमा पुगेको छ । निर्धारित समय गोलरहित बराबरी सकिएपछिको थप समयमा संकटाले गोल गरेपछि टोली १–० ले विजयी भएको छ ।

संकटाको संघर्षपूर्ण जितमा अफ्रिकन खेलाडी जिब्रेल नायक बने । उनले थप समयको १३ औं मिनेटमा गोल गरेका थिए । दिवा रात्री खेलमा लक्ष्मण रुचालको क्रसमा जिब्रेलले भलीमा गोल गर्दै टोलीलाई अघिल्लो चरणमा पुर्याएका थिए । कमजोर फिनिसिङका कारण संकटाले जितका लागि थप समय सम्म कुर्नु परेको थियो । कोलकाताको तुलनामा गोल गर्नका लागि पाएका धेरै अवसरलाई उसले सदुपयोग गर्न सकेन । निरन्तर पोष्ट आक्रमण गरेपनि संकटाको आधा दर्जन आक्रमण खेल गएको थियो ।

१५ औं मिनेटमा लक्ष्मणको पासमा जिब्रेलको प्रहार क्रसबार माथिबाट बाहिरियो । ३६ औं मिनेटमा लक्ष्मणको हेड प्रहारले पनि पोष्टको बाटो लिन सकने । ५३ औं मिनेटमा लक्ष्मणकै प्रहारमा कोलकाताका गोलकिपर अविजित सरदारले रोके । ६० औं मिनेटमा संकटाका युसुफको प्रहारले विपक्षी बार तोड्न सकेन । रिबाउण्डपछि प्रहार गरिएको बललाई पनि गोलकिपर अविजितले रोके । ६४ औं मिनेटमा जिब्रेलको अर्को प्रहारलाई अविजितले विफल पारे ।

संकटाको तुलनामा कोलाकाताले कम अवसर सृजना गर्यो । पाएका अवसरलाई सदुपयोग गर्न सकेन । १३ औं मिनेटमा आमिर हुसेनको पासलाई जोत मासीले गोलमा परिणत गर्न नसक्दा संकटालाई दबाबमा राख्ने कोलकाताको प्रयास सफल भएन । थप समयको २७ औं मिनेटमा पेनाल्टी बक्समा नोट्री जेम्सले गरेको प्रहार पोष्ट नजिकबाट बाहिरियो । लगत्तै केके फ्रयाङकोइसको प्रहार संकटाका गोलरक्षक सागर पियाको हातमा पुग्यो । रिबाउण्डमा गोलकिपर सागर विट भएपनि नोट्री जेम्सको प्रहार नवीन गुरुङले क्लियर गर्दा बराबरी टरेको थियो ।

कोलकाताका प्रशिक्षक अनन्त घोषले खेलाडीले राम्रो प्रदर्शन गरे पनि नतिजाले आफ्नो पक्षमा पर्न नसक्नु दुर्भाग्यपूर्ण भएको बताए । कटारी गोल्डपको उपविजेता संकटाका प्रशिक्षक सल्यान खड्गीले जुनियर खेलाडीका साथमा मैदानमा उत्रदा पनि नतिजा हात लग्नु गर्वको विषय भएको बताए ।

खड्गीले सिनियर खेलाडी बुटवलमा खेलिरहेका कारण जुनियर खेलाडी मात्र विराट गोल्डकपमा सहभागी भएको जानकारी दिए । ‘सुरुमै अग्रता लिनु पर्ने भए पनि राम्रा अवसरको सदुपयोग हुन सकेन,’ उनले भने, ‘तर अन्तिम समयमा आएर नतिजा उम्कन नपाउनु नै ठूलो कुरा हो ।’ संकटाका कप्तान सरोज दाहाल खेलेको घोषित भए र १० हजार रुपैयाँ प्राप्त गरे ।

विराट गोल्डकपमा सोमबारको खेल
रिजालको मोरङ–११ र रमपम झापा–११