विराटनगर (हाम्रो खेलकुद)– त्रिभुवन आर्मी क्लब विराट गोल्डकप फुटबल प्रतियोगिताको सेमिफाइनल पुगेर गरेको छ । साविक विजेता अर्को विभागिय टोली नेपाल पुलिस क्लबलाई टाइब्रेकरमा ४–२ ले हराउँदै आर्मी अन्तिम चारमा पुगेको हो । भोली हुने सेमिफाइनलमा आर्मीले रमपम झापाको सामना गर्नेछ ।

बुधबारको दिवा रात्री खेलको निर्धारित ९० र थप ३० मिनेट गोलरहित बराबरीमा टुंगिएपछि विभागिय डर्बीको नतिजा टाइब्रेकरमा निस्केको थियो । आर्मीको जितमा गोलरक्षक विकेश कुथुको भूमिका महत्वपूर्ण रहयो । उनले पेनाल्टी सुटआउटमा एउटा प्रहार रोके । आर्मीका लागि कप्तान भरत खवास, जर्जप्रिन्स कार्की, दिपक गुरुङ र विवेक बस्नेतले गोल गरे ।

पुलिसका सुमन लामा र दिनेश राजवंशी गोल गर्न सफल भए । निरकुमार राई र मानबहादुर परियारको प्रयास सफल भएन । निरकुमारको प्रहारलाई विकेशले रोकेका थिए । सिजनको तेस्रो भेटमा पनि पुलिसले आर्मीलाई हराउन सकेन । यस अघि तेस्रो झापा गाोल्डकपमा क्वाटरफाइनल र हेटौंडामा सुमन बम्जन स्मृति गोल्डकपमा फाइनलमा यी दुई टोलीबीच प्रतिस्पर्धा भएको थियो ।

खेलअवभिर पुलिसले उत्कृष्ट प्रदर्शन गरे पनि फिनिसिङ फितलो हुँदा र अन्तिममा तालमेल गुमाउँदाको फाइदा आर्मीलाई पुग्यो । पुलिसले गोल गर्नका झन्डै आधा दर्जन अवसर पाएको थियो । आर्मीले पनि केहि राम्रा अवसर खेर फाल्यो । खेल टाईब्रेरकमा जाने निश्चित भएपछि अन्तिम समयमा पुलिसले गोलकिपर परिवर्तन गरेको थियो । सत्रुघन चौधरीको ठाउँमा रोशन खड्का मैदान प्रवेश गरेका थिए । घरेलु मैदान आर्मीका कप्तान भरतको प्रदर्शन सन्तोष जनक रहेन ।

टोलीका अर्का स्ट्राइकर नवयुग श्रेष्ठको प्रदर्शन पनि खासै उल्लेख रहेन । नवयुगलाई चोट लागेपछि उनको ठाँउमा ५३ औं मिनेटमा विवेक बस्नेत मैदान प्रवेश गरेका थिए । आर्मीका प्रशिक्षक नविन न्यौपानेले आशा गरिए अनुरुपको नतिजा प्राप्त हुन नसकेको बताए । उनले पहिलो हाफमा धेरै खेलाडी परिवर्तन गर्नु पर्दा पुलिसको दबाव झेल्नु परेको बताए ।

‘रक्षा पंक्ती र पोष्ट एट्याकलाई मात्रै ध्यान दिएर खेलाडी मैदानमा उत्रिएको बताउँदै न्यौपानेले भने, ‘सुरुमै राम्रा खेलाडी घाइते हुँदा गोल गर्न सकिएन ।’पुलिसका प्रशिक्षक अनन्तराज थापाले खेलाडीले उत्कृष्ट प्रदर्शन गरे पनि नजिता निकाल्न नसक्नु दुर्भाग्यपूर्ण भएको बताए । उनले अन्तिम समय सम्म संघर्ष गरे पनि फिनिसिङमा समस्या आउँदा विपक्षीलाई नतिजा सुम्पनु परेको बताए । म्यान अफ दी म्याच पुलिसका रवि पासवानले १० हजार रुपैयाँ प्राप्त गरे ।

विराट गोल्डकपमा बिहीबारको खेल
मनाङविरुद्ध थ्री स्टार