दमक (हाम्रो खेलकुद) — गत वर्ष समान २ नकआउट उपाधि जितेका लक्ष्मी हुन्डाई मनाङ मस्र्याङ्दी र नेपाल पुलिस क्लब बर्षको पहिलो नकआउट उपाधिका लागि आज दमक गोल्डकप फुटबल प्रतियोगिताको फाइनलमा भिड्दैछन् ।

मनाङ टोली । फाइल तस्बिर

मनाङ भने यो वर्ष दोस्रो फाइनल खेल्दैछ । यसै महिना टोलीले इलामको माइभ्याली गोल्ड कपको फाइनल खेलको थियो । जहाँ मनाङ रुस्लान थ्री स्टार क्लबसँग पराजित भएको थियो ।

दमकमा टोलीले उच्च प्रदर्शन गरिरहेकोले यसपटक उपाधि जित्नेमा मनाङका विदेशी प्रशिक्षक फुजा टोपे आशावादी छन् । गत वर्ष पुलिसलाई आहा रारा गोल्ड कप र राखेप च्याम्पियनसिप जिताएका प्रशिक्षक अनन्त थापा आफ्नो टोली जित्ने दाबी गरे ।

पुलिससँग राष्ट्रिय टोलीका नम्बर १ गोलकिपर किरण चेम्जोङ रहेकाले पनि प्रशिक्षक थापाको मनोबल बढेको छ । थापाले भने ,’अहिले हामी जस्तो टोलीसँग पनि प्रतिस्पर्धा गर्न सक्षम छौं ।’ हाम्रो टिम जस्तोसुकै टिमसँग प्रतिस्पर्धा गर्न समक्ष देखिएको छ ।’ यहि प्रतियोगितामात्र पुलिसबाट खेलेका किरणले नेपाली क्लबमा पुलिसका खेलाडीबीच उत्कृष्ट तालमेल रहेको जनाउँदै फिनिसिङमा केही समस्या रहेको बताउँछन् ।

पुलिस क्लबका खेलाडी । फाइल तस्बिर

पुलिसका कप्तान कप्तान हेम तामाङले भने फिनिसिङमा ध्यान दिने बताउँछन् । उनले भने,‘ हामीले यहाँ राम्रो खेलिरहेका छौं । त्यसैलाई फाइनलमा जारी राख्नु पर्दछ । मनाङका कप्तान विराज महर्जनले अघिल्ला खेलहरुको कमजोरीमा सुधार गर्ने बताउँछन् । मनाङले गत वर्ष जेसिज कप र दुवही गोल्ड कपको उपाधि जितेको थियो ।

मनाङ त्रिभुवन आर्मी क्लबलाई टाइब्रकेरमा र पुलिसले एपिएफलाई हराउँदै एकअर्कासँगको भेट पक्का गरेका थिए । प्रतियोगिताको विजेताले १३ लाख ११ हजार र दोस्रो हुने टोलीले ६ लाख ११ हजार रुपैयाँ प्राप्त गर्नेछ ।