लन्डन (एजेन्सी)– विश्व फुटबलका महंगा खेलाडी पेरिस सेन्ट जर्मेन (पिएसजी) का सुपर स्टार नेयमारको खेल जीवनमा उनका पिताको भूमिका महत्वपूर्ण रहने विश्वास गरिन्छ । तर, नेयमारले आफ्नो खेलजीवनका बारेमा निर्णय गर्ने मुख्य व्यक्ति पिता नभई आफै भएको बताएका छन् । उनले पितालाई खाली सल्लाहकार मात्र भएको दाबी गरेका छन् ।

नेयमार सिनियर ब्राजिलियन सुपर स्टारका एजेन्ट पनि हुन् । उनकै पहलमा नेयमार बार्सिलोनाबाट पिएसजी पुगेका थिए । अहिले फेरि पिताकै पहलमा नेयमार रियल म्याड्रिड जाने चर्चा चलेको छ ।

चोट मुक्त भएपछि पूर्णरुपमा फिट हुने प्रयासमा रहेको नेयमारले आफ्नो जीवनमा पिताको भूमिका बारे भने, ‘उहाँले मेरो खेल जीवनको निर्णय गर्ने होइन । त्यो सबै निर्णय गर्ने मै हु । उहाँ मेरो उत्कृष्ट सल्लाहकार हो । तर, निर्णय म नै गर्छु ।’

पिताले आफ्नो खेल जीवनमा सधै चासो राखेको र त्यसले आफ्नो पुरा खेल जीवनमा राम्रो गरेको नेयमारले प्रष्ट पारेका छन् । फ्रान्सको बसाईका विषयमा कुरा गर्दै नेयमारले भने,’ त्यहाँ फुटबल भन्दा पनि मेरो लागि चुनौति भाषा सिक्न हो । म अझै पनि पुरा जान्ने भएको छैन । तर, प्रयास जारी छ । ‘

उनले फुर्सदको समय परिवार र साथीसँग बिताउने गरेको उल्लेख गर्दै युरोपमा गोपनियताका मामलामा केहि कठिन हुने बताए ।’ विश्व कपका विषयमा चर्चा गर्दै उनले भने, ‘यो मेरो विश्व कप मेरो लागि होइन । यो त ब्राजिलियन फुटबल टोलीका लागि हो ।’