सिमरा (हाम्रो खेलकुद) – वडा नम्बर ४ लाई स्तब्ध पार्दै वडा नं. १२ जीतपुरसिमरा नगर स्तरीय प्रथम मेयर कप फुटत्रबल प्रतियोगिताको क्वाार्टरफाइनलमा प्रवेश गरेको छ । सिमरा रंगशालामा आइतबार भएको खेलमा वडा नं. ४ लाई १–० ले पराजित गर्दै वडा नं. १२ ले अन्तिम आठको यात्रा तय गरेको हो । टोलिको जितमा सुमन चौधरीले निर्णायक गोल गरे ।

प्रतिस्पर्धात्मक खेलमा वडा नं. १२ ले खेलको ३०औं मिनेटमा गोल गरेको थियो । वडा नं. ४ का रंक्षापंक्ती कमजोरीको फाइदा उठाउदै सुमनले गोल गरे र त्यहि खेलको निर्णायक बन्यो । खेलको दोस्रो हाफमा वडा नं. ४ ले आकर्षक प्रदर्शन गरेपनि खेलमा फर्किन सकेन । दोस्रो हाफमा वडा नं. १२ लाई दबावमा राखेको वडा नं. ४ को फिनिसिङ पक्ष भने कमजोर देखियो ।

पहिलो खेलमा वडा नं. १९ लाई पराजित गर्दै प्रिक्वार्टरमा प्रवेश गरेको वडा नं. १२ को प्रतियोगितामा यो दोस्रो जित हो । वडा नं. ४ ले भने पहिलो खेलमा वडा नं. २३ लाई पराजित गरेको थियो । वडा नं. १२ ले अब सेमिफाइल प्रवेशका लागि वडा नं. ७ संग खेल्नेछ । खेलमा वडा नं. १२ का नविन राय म्यान अफ दि म्याच घोषित भए ।

नविनलाई सामुदायिक बिकासशील क्लबका अध्यक्ष दिपक भट्टराई, भेट्रान क्लब सिमराका अध्यक्ष समिर आले र त्रिलोक शाह ठकुरीले ट्रफि प्रदान गरेका थिए ।जीतपुरसिमरा उपमहानगरपालिकाको सहयोगमा सामुदायिक बिकासशील क्लबले आयोजना गरेको प्रतियोगिताको विजेताले ५० हजार र उपविजेताले २५ हजार रुपैयाँ प्राप्त गर्नेछ । प्रतियोगिताको फाइनल असार २ गते हुनेछ ।