काठमाडौं (हाम्रो खेलकुद) — अखिल नेपाल फुटबल संघ (एन्फा) ले सिनियर राष्ट्रिय टिमको सहायक प्रशिक्षकमा किरण श्रेष्ठलाई नियुक्त गरेका छन् । उनी सहारा क्लब पोखराको प्रशिक्षक हुन् ।

 

एन्फाले सिनियर राष्ट्रिय टिमको कार्यवहाक मुख्य प्रशिक्षकको रुपमा यसअघिका सहायक प्रशिक्षक बालगोपाल महर्जनलाई नियुक्त गरेको भोलिपल्ट अर्थात बिहिबार किरणलाई सहायक प्रशिक्षकको रुपमा नियुक्त गरेको एन्फा प्रवक्ता किरण राईले हाम्रो खेलकुदलाई जानकारी दिए । बंगलादेशमा आयोजना हुने १२औं संस्करणको साफ च्याम्पियनसिपलाई लक्षित गर्दै एन्फाले किरणलाई सहायक प्रशिक्षकमा नियुक्त गरेको हो । गोलकिपर प्रशिक्षकमा भने नवीन महर्जन यथावत छन् ।

सहायक प्रशिक्षकमा नियुक्त भएसँगै प्रशिक्षक श्रेष्ठले एन्फाले विश्वास गरेर दिएको यो मौकालाई खेर जान नदिने बताए । ‘एन्फाले मलाई विश्वास गरेर राष्ट्रिय टिमको सहायक प्रशिक्षकमा नियुक्त गरेको छ । म एन्फालाई धन्यवाद दिन चहान्छु । यो मौकालाई म खेर जाने दिनेछैन । मुख्य प्रशिक्षक बालगोपाल महर्जनको ट्याक्टिस र मेरो ट्याक्टिसलाई सहकार्य गरी अघि बढ्नेछौं । साफमा राम्रो नतिजा दिने मेरो प्रयास हुनेछ ।’ उनले आजदेखि प्रशिक्षण शुरुवात गर्नेछ ।

पोखराबाट व्यावसायिक खेलजीवन र प्रशिक्षण शुरुवात गरेका ४२ वर्षीय किरण एएफसीको ‘ए’ लाइसेन्स प्राप्त प्रशिक्षक हुन् । पोखराको सहारा क्लबबाट खेलजीवन शुरुवात गरेका उनले ‘ए’ डिभिजन क्लब जावलाखेलबाट २०५६ देखि २०६१ सम्म खेल्ने क्रममा उनले टिमको कप्तानी समेत सम्हालेका थिए । त्यसपछि प्रशिक्षणमा लागेका उनले साहरा क्लबबाटै प्रशिक्षण शुरुवात गरेका थिए । सहारापछि उनले ‘ए’ डिभिजन लिगमा बौद्ध फुटबल क्लब, राष्ट्रिय लिगमा सूदुरपश्चिम–११ फुटबल क्लब, नकआउट प्रतियोगिताहरुमा हिमालयन शेर्पा र कास्की–११ लाई प्रशिक्षण दिइसकेका छन् ।

साफ च्याम्पियनसिप यही भदौ १९ देखि ३० सम्म बंगालादेशको ढाकामा हुँदैछ । नेपाल समूह ‘ए’ मा रहेको छ । नेपालले ४ सेप्टेम्वरमा पाकिस्तानसँग खेल्दै साफको शुरुवात गर्नेछ । ६ सेप्टेम्वरमा भुटान र ८ सेप्टेम्वरमा आयोजक बंगलादेशको सामना गर्नेछ । नेपाल अहिलेसम्म साफ च्याम्पियसिपको सेमिफाइनलभन्दा अघि बढ्न सकेको छैन ।