एजेन्सी – इंग्ल्यान्ड स्टार डेविड बेकह्यामले अमेरिकी लिग मेजर लिग सकारमा इन्टर माएमी क्लब खरिद गरेपछि विभिन्न महत्त्वकांक्षा अगाडी सार्दै आएका छन् । सन् २०२० मा पहिलो सिजन खेल्ने तयारीमा रहेको क्लबका लागि उनले अर्जेन्टिनी स्टार लिओनेल मेसीलाई क्लबमा ल्याउने गृहकार्य गरिरहेको खुलेको छ ।

बेकह्यामले लिगमा क्लबको आगमनलाई ठूलो महत्त्व दिँदै नाम चलेका खेलाडीलाई क्लबमा अनुबन्धन गर्न अहिले देखि प्रक्रिया चालिसकेका छन् । मेसीको हाल बार्सिलोनासँगको सम्झौता २०२०-२१ सिजनसम्मका लागि मात्र रहेको छ । त्यसबेला मेसीको उमेर पनि ३३ वर्ष पुगिसकेको हुनेछ । यस्तो अवस्थामा माएमीले ठूलो रकमको प्रस्ताव राखेको खण्डमा क्लब र खेलाडी दुवैका लागि माएमीको प्रस्ताव सनादर्भिक हुने विश्लेषकहरुको ठम्याई छ ।

यद्यपी हालसम्म मेसी र बार्सिलोनासँग कुनै औपचारिक प्रस्ताव भने गरिएको छैन । क्लब स्रोतका अनुसार माएमीले अन्य केहि खेलाडीलाई पनि सम्भावनाको रुपमा हेरेको छ । मेसी भने उक्त सुचिमा शीर्ष स्थानमा छन् । यदि उनले व्यक्तिगत रुपमा आउन चाहेमा क्लबले बार्सिलोनासँग सम्झौता गर्ने छ । बार्सिलोना छाडेपछि मेसीले अन्य युरोपेली क्लबमा नखेल्ने हुनाले पनि माएमीमा उनी जाने सम्भावना बढेको हो ।

यसअघि मेसीले बार्सिलोनामा करिअर सकिने सम्भावना नरहेको र अर्जेन्टिना गएर आफ्नो बाल्यकालको क्लबमा खेल्ने बताएका थिए । तर विगत केहि समययता अर्जेन्टिनाको राष्ट्रिय टोलीमा उनको प्रदर्शनलाई लिएर अर्जेन्टिनी समर्थकहरु निराश भएका कारण उनले अर्जेन्टिना नफर्कने मनस्थिति बनाएका छन् । पछिल्लो पटक विश्वकप र कोपा अमेरिकाको प्रदर्शनका बाबजुद उनि आलोचित हुँदै आएका छन् ।

बेकह्यामले क्लब खरिद गरेको माएमी सहरमा ७० प्रतिशत भन्दा बढी ल्याटिन जनसंख्या रहेको छ । यसका कारण पनि मेसी र उनको परिवारलाई यस क्षेत्रमा बसोबास गर्न सहज हुने अनुमान लगाइएको छ । एमएलएसले विगत लामोसमयदेखि युरोपका ठूला खेलाडी भित्र्याउँदै आएकोमा मेसीको आगमनले लिगले नयाँ आयाम पाउने धेरैले अपेक्षा राखेका छन् ।

अहिलेसम्म युरोपका खेलाडीहरु करिअरको अन्त्यतिर एमएलएस पस्दै आएका छन् । तर माएमीले उच्च लयमा खेलिरहेका स्टार खेलाडीलाई पनि अमेरिका ल्याएर नयाँ माहोल सिर्जना गर्ने लक्ष्य राखेको छ । यसका लागि क्लबले मोटो रकम खर्चिन तयार रहेको क्लब स्रोतले जानकारी दियो । मेसीको आगमन त्यसको लागि सुखद सुरुआत हुने अपेक्षा उनीहरुको छ ।