ललितपुर (हाम्रो खेलकुद) – पाँच वर्षपछि आयोजना हुन लागेको सहिद स्मारक ए डिभिजन लिगको विजेताले पाउने रकम अखिल नेपाल फुटबल संघ (एन्फा) ले घटाएको छ । २०७० सालको विजेताले ७५ लाख रुपैयाँ पाएको लिगको विजेताले यसपटक भने ५० लाख रुपैयाँ प्राप्त गर्ने भएको छ ।

तर, एन्फाले भने विजेताको पुरस्कार राशी घटे जस्तो देखिएपनि लिगमा विगतमा भन्दा बढी लगानी हुन लागेको बताएको छ । असोज १३ गते सुरु हुने लिगको विजेताले ५० लाख, दोस्रो हुनेल टोलीले ३५ लाख, तेस्रोले २५ लाख, चौथो टोलीले १५ लाख रुपैयाँ प्राप्त गर्नेछ । त्यस्तै एन्फाले पाँचौं हुने टोलीले ७ लाख, र छैटौं हुने टोलीले ५ लाख रुपैयाँ पुरस्कार दिने भएको छ ।

विजेताले मात्र पुरस्कार पाउने भन्दा पनि अन्य टोलीले पनि रकम प्राप्त गरुन भन्नका लागि समानताका आधारमा पुरस्कार राशी तोकिएको एन्फा प्रवक्ता किरण राईले बताए । एन्फाले १४ ए डिभिजन टोलीलाई तयारी वापत २० लाख रुपैयाँ दिने भएको छ । त्यस्तै लिगको हरेक खेलको विजेताले ५० हजार रुपैयाा प्राप्त गर्नेछ भने बराबरीमा टुंगिएको खेलमा दुवै टोलीले समान १५ हजार रुपैयाँ प्राप्त गर्नेछन् ।

१४ औं स्थानमा लिगको अन्त्य गर्ने टोलीको अर्को वर्षका लागि २ अंक घटाउने र तयारी खर्चको ३ लाख रुपैयाँ पाउने छैन । त्यस्तै १३ औं स्थानमा आउने टोलीको हकमा अर्को वर्षका लागि १ अंक घटाउने र तयारी खर्चमा २ लाख रुपैयाँ नपाउने भएको छ । यसले म्याक्स फिक्सिङलाई निरुत्साहित पाउनेमा लिग सञ्चालक समितिका संयोजक विज्ञानराज शर्माले बताए ।

लिगको अनुशासित टोलीले १ लाख रुपैयाँ पाउनेछ भने विधागत रुपमा उत्कृष्ट (गोलकिपर, डिफेन्स, मिडफिल्ढ, फरवार्ड) र प्रशिक्षकले मोटरसाइकल प्राप्त गर्नेछन् । लिगको विजेताले एएफसी एसियन कपमा नेपालको प्रतिनिधित्व गर्नेछ ।

लिगका लागि एन्फाले ५ करोड ८० लाख रुपैयाँ खर्च हुने अनुमान गरेको छ । त्यसका लागि फिफा फरवार्ड फुटबल डेभलप्मेन्ट कार्यक्रम अन्तर्गत ए,बी,सी डिभिजन लिग सञ्चालका लागि ६ लाख ८८ हजार अमेरिकी डलर प्राप्त भएको एन्फाले जानकाएको छ । रेलिगसेन विनाको यसपटकको लिगमा ९१ खेल हुनेछन् ।