काठमाडौं (हाम्रो खेलकुद)-भारतको आग्रामा हुने ४६ औं संस्करणको एसियन स्कुल यू–१८ च्याम्पियनसीप फुटबल प्रतियोगितामा सहभागी हुने नेपाली राष्ट्रिय टोलीलाई विराटनगरमा विदाई गरिएको छ । २० खेलाडी सहितको २८ सदस्यीय टोली असोज ४ गते भारत प्रस्थान गर्नेछ ।

प्रदेश १ का मुख्य मन्त्री शेरधन राई, सामाजिक विकास मन्त्री जीवन घिमिरे, अखिल नेपाल फुटबल संघ (एन्फा) का केन्द्रीय अध्यक्ष कर्मा छिरिङ शेर्पा, विराटनगर महानगरपालिकाका मेयर भीम पराजुलीलगायतले खेलाडीलाई विजयको शुभकामना सहित विदाई गरे ।

एन्फा अध्यक्ष शेर्पाले नेपाली टोलीलाई जितका लागि शुभकामना दिंदै नेपाली फुटबललाई व्यवसायिक बनाउन धेरै काम भइरहेको जानकारी दिए । एन्फाका केन्द्रीय सदस्य एवं प्रवक्ता किरण राईले सबै प्रतियोगिताको काठमाडौंमा भइरहने बन्द प्रशिक्षणलाई ‘आइसब्रेक’ गर्दै एसियन च्याम्पियनसिपको बन्द प्रशिक्षण विराटनगरमा गराएर नेपाली फुटबल इतिहास भत्काइएको दावी गरे ।

इतिहास भत्काउन पनि भारतको आग्रा अनुकुलको मौसम रहेको विराटनगरमा बन्द प्रशिक्षण राखिएको उनको भनाइ छ । प्रतियोगिता अन्र्तगत समूह ‘क’ मा रहेको नेपालले थाइल्याण्ड, इन्डोनेशिया र चीनसंग प्रतिष्पर्धा गर्ने छ । त्यसै गरी समूह ‘ख’ मा आयोजक राष्ट्र भारत, श्रीलंका, दक्षिण कोरिया र मलेशिया रहेका छन् । नेपालले असोज ७ गते थाइल्याण्डसंग पहिलो खेल खेल्ने छ ।

मुख्य प्रशिक्षक चेतनारायण श्रेष्ठले प्रतियोगिताका लागि टोली पूर्ण रुपमा तयार रहेको जानकारी दिए । एक महिना विराटनगरमा सम्पन्न बन्द प्रशिक्षण खेलाडीको टीम तयार पारिएको हो । पहिलो पटक नेपाली फुटबल टोलीले यस प्रतियोगितामा सहभागिता जनाउने भएको हो । प्रतियोगिता ४ असोजदेखि १० दिन सम्म चल्ने छ ।