काठमाडौं (हाम्रो खेलकुद)- अखिल नेपाल फुटबल संघ (एन्फा) ले बुधबारबाट काठमाडौमा आयोजना हुने समूह ‘ई’ अन्तर्गतको एएफसी यु–१६ महिला च्याम्पियनसिपको सम्पुर्ण तयारी पुरा जानकारी गराएको छ ।

एन्फाले सोमबार एन्फा मुख्यालय सातदोबाटोमा पत्रकार सम्मेलन गर्दै प्रतियोगिताको सम्पुर्ण तयारी पुरा भएको जानकारी गराएको हो नेपाल रहेको समूह ‘इ’ बाट सिरियाले आफ्नो नाम फिर्ता लिएपछि यो समूहमा नेपालसहित चार टोलीको सहभागिता छ ।

एन्फाका महासचिव इन्द्रमान तुलाधरले एएफसीको तयारीका लागि गत महिना साफ यु–१५ प्रतियोगितामा सहभागिता जनाएको उल्लेख गर्दै यसपटक सन्तोषजनक नतिजाको अपेक्षा गरिएको बताए ।

‘हामीले अन्य प्रतिद्धन्द्धीको बारेमा बुझेका छैनौ । तर, हामी छनोट हुने लक्ष्यसहित खेल्नेछौं । हामीले नियमित रुपमा प्रशिक्षण गरेका छौं । शीर्ष दुईमा रहँदै छनोट हुने हाम्रो योजना छ ’ महासचिव तुलाधरले भने । नेपालले सेप्टेम्बर १९ मा फिलिपिन्ससँग खेल्दै छनोटको शुरुवात गर्नेछ ।

नेपालले म्यानमारसँग सेप्टेम्बर २१ मा खेल्नेछ । छनोटको अन्तिम खेलमा नेपालले मलेसियासंग सेप्टेम्बर २३ मा खेल्नेछ । प्रतियोगिताको लागि सबै तीन टोली नेपाल आइसकेको एन्फाले जनाएको छ । छनोटको सम्पूर्ण खेल हल्चोकस्थित एपीएफ क्लबको मैदानमा हुनेछ ।