लन्डन (एजेन्सी)– च्याम्पियन्स लिगको समूह चरणअन्तर्गत पेरिस सेन्ट जर्मेन र लिभरपुलको खेलमा समर्थकहरुले भरपुर मनोरञ्जन प्राप्त गर्ने पिएसजी कप्तान थियागो सिल्भाले बताएका छन् । लिभरपुल र पिएसजी विश्व फुटबलमा बलियो आक्रमण रहेको पनि उनले बताए ।

मोहमद सलाह, रोबेर्टो फिर्मेनो र साडियो मानेको आक्रमणले लिभरपुल निकै बलियो मानिएको छ । अघिल्लो सिजन च्याम्पियन्स लिगमा उच्च प्रदर्शन गर्न चुकेको पिएसजी पनि यसपटक लयमा देखिने विश्वास गरिएको छ ।

केलियन एमबाप्पे, नेयमार र इडिन्सन काभानीको बलियो आक्रमणमा पिएसजी निकै बलियो रहेको छ । सिल्भाले पनि टोलीले सफल नतिजा प्राप्त गर्ने विश्वास लिएका छन् । ‘सफल सुरुवातका लागि आशावादी छौं र हामी तयार छौं,’ सिल्भाले भने, ‘हामी खेलमा केन्द्रित छौं । मलाई लाग्छ आज वास्तविक फुटबल हुनेछ ।’

उनले आजको खेलमा विश्व फुटबलका सम्भवना सबैभन्दा मजबुत अग्रपंक्ति फुटबलको मज्जा लिन पाउने विश्वास व्यक्ति गरे । दुवैमा तीन जना फरवार्ड छन् । ‘त्यसले खेलमा निकै रोमाञ्चकता दिनेछ,’ सिल्भाले भने, ‘मलाई लाग्छ यो खेल निकै उत्साहजनक र रोमाञ्चक हुनेछ ।’

समूहमा यी दुई टोलीलाई अघिल्लो चरण पुग्ने दाबेदारका रुपमा हेरिएको छ । सोही समूहको अर्को खेलमा नेपोली र रेड स्टार बेलग्रेडबीच प्रतिस्पर्धा हुनेछ ।