च्याम्पियन्स लिग : मंगलबार रातिको नतिजाहरु

एजेन्सी – युरोपेली च्याम्पियन्स लिग अन्तर्गत मंगलबार समूह चरणअन्तर्गत पहिलो खेल समाप्त भएको छ । समूह ‘ए’ देखि ‘डी’ सम्मको खेलका नतिजा यसप्रकार छन् ।

समूह ‘ए’ मा बोरुसिया डर्टमुन्डले क्लब ब्रुजाको मैदानमा १-० को जित दर्ता गर्यो । क्रिस्टियन पुलिसिचले खेलको ८५ औं मिनेटमा गरेको गोल नै जितको लागि पर्याप्त रहयो । एटलेटिको म्याड्रिडले मोनाकोको घरेलु मैदानमा २-१ को जित रच्यो । स्यामुएल ग्रान्डसरको गोलमा मोनाकोले १८ औं मिनेटमा अग्रता लिएपनि डिएगो कोस्टा र जोसे हिमिनेजले गोल गर्दो खेल एटलेटिकोको पक्षमा पारे ।

समूह ‘बी’ मा टोटेनहम हट्स्पर इन्टर मिलानको मैदानमा २-१ ले पराजित भयो । कप्तान माउरो इकार्डी र माटियास भेचिनोले गोल गर्दै इन्टरलाई जित दिलाए । त्यसअघि स्पर्सले क्रिस्टियन एरिक्सनको गोलमा अग्रता लिएको थियो । बार्सिलोनाले डच क्लब पीएसभीलाई ४-० को फराकिलो अन्तरले हरायो । बार्साको जितमा लिओनेल मेसीले ह्याट्रिक हान्दा ओस्मान डेम्बेलेले १ गोल गरे ।

निकै प्रतिस्पर्धात्मक मानिएको समूह ‘सी’ मा लिभरपुलले विजयी सुरुआत पायो । घरेलु मैदान एनफिल्डमा लिभरपुल पीएसजीलाई ३-२ ले पराजित गर्न सफल रहयो । फ्रान्सेली च्याम्पियन पीएसजीले २-० ले पछाडी परेको स्थितिलाई बराबरीसम्म ल्याएको थियो । पहिलो हाफमा ड्यानीएल स्टरिज र जेम्स मिल्नरले घरेलु टोलीका लागि गोल गरे । दोस्रो हाफमा पीएसजीले थोमस मुनिएर र किलियन एमबाप्पेको गोलमा पुनरागमन गर्यो । तर वैकल्पिक खेलाडी रोबर्टो फिर्मिनोले अतिरिक्त समयमा गोल गर्दै महत्त्वौर्ण जित दिलाए । समूहको अर्को खेलमा नेपोली र रेड स्टार बेलग्रेड दुवैले कुनै गोल गर्न सकेनन् ।

सबैभन्दा कमजोर मानिएको समूह ‘डी’ मा गालाटासरेले लोकोमोटिभ मस्कोलाई ३-० ले हराउँदै विजयी सुरुआत गर्यो । टर्किस टोलीको जितमा ग्यारी रोड्रीग्वेस, एरेन डर्डीयोक र सेल्चुक इनानले गोल गरे । अर्को खेलमा एफसी साल्का र एफसी पोर्टोले १-१ को बराबरी खेले । साल्काले ब्रील एम्बोलोको गोलमा अग्रता लिएपनि ओताभियोले खेल बराबरीमा ल्याएका थिए ।