काठमाडौं (हाम्रो खेलकुद) – काठमाडौंमा जारी एएफसी यू–१६ महिला च्याम्पियनसिप छनोट अन्तर्गतको समुह ‘ईं’ दोस्रो खेलमा नेपालले म्यानमारसँग फराकिलो हार बेहोरेको छ ।

 

हल्चोकस्थित सशस्त्र प्रहरी बलको खेल मैदानमा शुक्रबार भएको खेलमा नेपाल म्यानमारसँग ११–१ को फराकिलो गोल अन्तरले पराजित भएको हो । लगातार दोस्रो हारसँगै नेपालको छनोट हुने सम्भावना सकिएको छ । म्यानमारसँग निरिह देखिएको नेपालले पहिलो हाफमा १० गोल खाएको थियो । दोस्रो हाफमा सुधारिएको खेल पस्केको नेपालले एक गोल फर्काउन सफल हुदा एक गोल खान पुगेको थियो । नेपालकी निकिता थोकरले एक गोल फर्काइन् ।

शुक्रबारै भएको अर्काे खेलमा फिलिपिन्सले मलेसियालाई १–० ले पराजित गरेको छ । फिलिपिन्सलाई जित दिलाउन अलामोले निर्णायक गोल गरिन् । पहिलो हाफ गोलरहित बराबरीमा सकिएको खेलको ८१ औं मिनेटमा अलामोले गोल गरेकी हुन् ।

लगातार दुई जितसँगै फिलिपिन्सले ६ अंक जोडेको छ । मलेसियाको यो लगातार दोस्रो हार हो । यसअघि पहिलो खेलमा फिलिपिन्सले नेपाललाई ४–० ले पराजित गरेको थियो ।

नेपालले समूह चरणको अन्तिम खेलमा आइतबार मलेसियासँग प्रतिस्पर्धा गर्नेछ । सोही दिन म्यानमार र फिलिपिन्सबीच समूह विजेताको टुङ्गो लगाउने खेल हुनेछ ।

समूहको शीर्ष दुई टोलीले अर्को बर्ष थाइल्याण्डमा हुने एएफसी यू–१६ महिला च्याम्पियनसिपको यात्रा तय गर्नेछन् । फाइनल चरणमा आठ टोलीले खेल्नेछन् । आयोजक थाइल्याण्डसहित, जापान दक्षिण कोरिया र उत्तर कोरिया फाइनल चरणको लागि छनोट भैसकेका छन् ।