म्युनिख (एजेन्सी) – डिफेन्डिङ च्याम्पियन बायर्न म्युनिखले जर्मन बुन्डेस लिगामा आफ्नो अपराजित यात्रालाई कायम राखेका छन् । म्युनिखले एफसी साल्केलाई २–० ले पराजित गर्दै बुन्डेस लिगामा आफ्नो अपराजित यात्रालाई कायम राखेका हुन् ।

एफसी साल्केको घरेलु मैदानमा भएको खेलमा म्युनिखलाई जिताउन जेम्स रोड्रिग्वेज र रोवर्ट लेवान्डोस्कीले गोल गरे । म्युनिखले खेलको आठौं मिनेटमा जेम्स रोड्रिग्वेजको गोलबाट खेलमा अग्रता लिएको थियो । जोसुवा किम्मिचको कर्नरमा प्राप्त बललाई जेम्सले हेडमार्फत गोलको दिशा दिएका थिए ।

खेलभर नै साल्केलाई दवावमा राखेको म्युनिखले दोस्रो गोलको लागि भने ६४औं मिनेट कुर्नुपरेको थियो । ६४औं मिनेटमा बायर्नले पेनाल्टीमार्फत गोल गर्दै खेलमा २–० को अग्रता बनाएको थियो । जेम्सलाई डि–बक्समा लडाएपछि बायर्नले पेनाल्टीको मौका पाएको थियो । जसमा रोबर्ट लेवान्डोस्की चुकेनन् ।

त्यसपछि पनि म्युनिखले गोल गर्ने केही मौकाहरु खेर फालेको थियो । यता, साल्केले गोल गर्ने केही मौकाहरु खेर फाल्दा घरेलु मैदानमा पराजित हुन पुग्यो ।
जितपछि बायर्न ४ खेलबाट १२ अंकसहित लिगको शीर्ष स्थानमा छ । दोस्रो स्थानमा रहेको हर्था बर्लिनको १० अंक छ ।

बुन्डेस लिगा अन्र्तगत नै शनिबार राति भएको अर्काे खेलमा बोरुसिया डर्टमन्डले होफेनहेमसँग १–१ गोलको बराबरी खेल्दै अंक बाँडे । डर्टमन्डले खेलमा पछि परेको स्थिति उल्ट्याएर बराबरीको नतिजा निकालेको हो । होफेनहेमका जोइलिन्टनले गोल गर्दा क्रिस्यिन पुलिसिकले खेल सकिन ६ मिनेट बाँकी रहँदा बराबरी गोल फर्काएका थिए । बराबरीपछि डर्टमन्ड ८ अंकसहित तेस्रो तथा होफेनहेम ४ अंकसहित ११औं स्थानमा छ ।

जर्मन बुन्डेस लिगाका नजिताहरु
स्टुटगार्ट विरुद्ध फोर्टुना डुसेलडर्फ (०–०)
हर्था बर्लिन विरुद्ध बोरुसिया एमग्लाडवाच (४–२)
अग्सवर्ग विरुद्ध वेडर ब्रेमेन (२–३)
वल्सवर्ग विरुद्ध फेरवर्ग (१–३)
नमवर्ग विरुद्ध ह्यानोभर (२–०)