काठमाडौं (हाम्रो खेलकुद) – एएफसी यू–१६ महिला च्याम्पियनसिप अन्तर्गतको छनोटको समूह ‘ई’ को अन्तिम खेलमा नेपाल र मलेसियाले बराबरी खेल्दै छनोटमा पहिलो अंक जोडेको छ । नेपाल र मलेसियाले ४–४ गोलको बराबरी खेल्दै अंक बाँडेका हुन् ।

हल्चोकस्थित सशस्त्र प्रहरी बलको खेल मैदानमा आइतबार भएको प्रतिस्पर्धात्मक खेलमा नेपाल खेलमा पछि परेको स्थिति उल्ट्याउदै मलेसियालाई बराबरीमा रोक्न सफल भएको हो । नेपालकी कप्तान प्रिती राई, सुस्मा तामाङ र सबिता रानामगरले समान एक गोल गरन् । एक गोल उपहार पाएको थियो मलेसियाकी हेल्मा इम्लीले दुई तथा नरुल नबिला र विटी तामिङले समान एक गोल गरिन् ।

चार टोली रहेको प्रतियोगितामा नेपाल पुछारमा रह्यो । गोलअन्तरमा मलेसिया तेस्रो स्थानमा रह्यो । दुवै टोलीले अघिल्ला दुई खेलमा हार बेहोरेका थिए ।
यो समूह बाट म्यानमारले दोस्रो चरणमा स्थान बनायो । समूह चरणको अन्तिम खेलमा आइतबार फिलिपिन्सलाई ५–१ ले पराजित गर्दै म्यानमार समूह विजेता बन्दै दोस्रो चरणमा पुग्न सफल भए । फिलिपिन्सको पनि उत्कृष्ट उपविजेता बन्दै दोस्रो चरणको यात्रा तय गर्ने सम्भावना छ ।

दोस्रो चरणबाट छनोटबाट ४ हुने टोलीले थाइल्याण्डमा अर्को वर्ष हुने एएफसी यू–१६ महिला च्याम्पियनसिप खेल्नेछ । थाइल्याण्डमा हुने एएफसी यू–१६ महिला च्याम्पियनसिपमा ८ टोलीले खेल्नेछन् । आयोजक थाइल्याण्डसहित, जापान, दक्षिण कोरिया र उत्तर कोरिया फाइनल चरणको लागि छनोट भैसकेका छन् ।