काठमाडौं (हाम्रो खेलकुद) – भारतको आगरामा जारी एसियन स्कुल यू–१८ च्याम्पियनसिपमा नेपालले दोस्रो हार बेहोरेको छ । आगरा स्थित प्रिल्युड पब्लिक स्कुल स्टेडियममा सोमबार भएको खेलमा नेपाल इन्डोनेसियासँग २–१ ले पराजित भयो । खेलमा लिएको अग्रता जोगाउन नसक्दा नेपाली टोलीको सेमिफाइनल यात्राको सम्भावना कमजोर बनेको छ । 

नेपाल पहिलो खेलमा थाइ्ल्याण्डसंग नेपाल २–० ले पराजित भएको थियो । लगातार दोस्रो हारपछि नेपालको यात्रा समूह चरणमै टुंगिने सम्भावना बढेको छ । सेमिफाइनल पुग्नका लागि अब नेपालले चीन र अफगानिस्तानलाई पराजित गरेर मात्रै पुग्दैन अन्य खेलको नतिजा पनि कुर्नुपर्ने हुन्छ ।

राजन गुरुङको गोलमा ५० औं मिनेटमा नेपालले अग्रता लिएको थियो । दिनेश हेन्जनको कर्नरमा राजनले हेड गोल गरेका थिए । तर नेपालको त्यो खुसी एक मिनेट पनि टिक्न सकेन । नेपाली खेलाडी सम्हालिन नसकेको मौका छोप्दै इन्डोनेसियाले खेलमा फर्कने अवसर पायो ।

५१ औं मिनेटमा इन्डोनेसियाका एलेनले नेपाली डिफेन्सको कमजोरीको फाइदा उठाउँदै गरेको लामो प्रहार गोलकिपर विष्णुकुमार केसीले रोक्न सकेनन् र खेलमा बराबरी भयो । ६७ औं मिनेटमा अल्फएड्राले पेनाल्टीमा गरेको गोल खेलेको निर्णायक बन्यो ।

नेपालका मुख्य प्रशिक्षक चेतनारायण श्रेष्ठले नेपाली टोलीले सत प्रतिशत खेले पनि नतिजाबाट विमुख हुनु परेको बताए । ‘शारीरिक र प्राविधिक रुपमा इन्डोनेसिया मजबुत थियो,’ उनले भने, ‘तर पनि खेललाई भने नेपालले नियन्त्रणमा राख्न सक्नु नै ठूलो कुरा हो ।’ श्रेष्ठले नेपालको हारको मुख्य कारण आयोजकको रेफ्री छनौट र रेफ्रीले मैदानमा गरेको गलत निर्णय नै भएको बताए । सोमबारकै अर्को खेलमा थाईल्याण्डले अफगानिस्तानलाई पराजित ग¥यो ।

प्रतियोगित अन्तर्गत समूह ‘ए’ मा थाईल्याण्ड, इन्डोनेसिया, अफगानिस्तान र चीन रहेका छन् । तीनवटा खेल जितेको थाईल्याण्ड नौ अंक सहित शीर्ष स्थानमा छ । इन्डोनेसिया ६ अंक सहित दोस्रो र चीन तीन अंक सहित तेस्रो स्थानमा छ । नेपाल र अफगानिस्तानको अंक शुन्य छ ।

समूह ‘बी’ मा आयोजक राष्ट्र भारत, भुटान, दक्षिण कोरिया, मलेसिया र श्रीलंका रहेका छन् । समूह ‘बी’ मा दक्षिण कोरिया शीर्ष स्थानमा छ । मलेसिया दोस्रो, श्रीलंका तेस्रो र भारत चौथो स्थानमा छ । भुटानले अंक जोड्न सकेको छैन ।