काठमाडौं (हाम्रो खेलकुद) – फिफाले वर्षेनी विभिन्न विधामा उत्कृष्ट रहने गरेका खेलाडी, प्रशिक्षक तथा व्यक्तित्वलाई फिफा ‘द बेस्ट’ अवार्डबाट सम्मानित गरेको छ ।

च्याम्पियन्स लिगको उपाधि तथा फिफा विश्वकपमा उपविजेता स्थान हांसिल गरेका लुका मोड्रिचले झन्डै ३० प्रतिशत मत प्राप्त गर्दै उत्कृष्ट खेलाडीको उपाधी जिते । विश्वकपका उत्कृष्ट खेलाडी पनि घोषित भएका उनले १० वर्षे लामो लियोनल मेस्सी र क्रिस्टियानो रोनाल्डोको उत्कृष्ट खेलाडिको उपाधिमा बाहुल्यता पनि तोड्न सफल भए ।

हरेक राष्ट्रिय टोलीका कप्तान, प्रशिक्षक र मिडियाकर्मीले शीर्ष ३ खेलाडी छनोट गरेका थिए । पहिलो स्थानमा रहेको खेलाडीले ५ अंक पाउने गर्छ भने दोस्रो स्थानको खेलाडीले ३ र तेस्रो स्थानको खेलाडीले १ अंक प्राप्त गर्दछ । यसै बीच नेपाली राष्ट्रिय टोलीका कप्तानका रुपमा विराज महर्जन र प्रशिक्षकका रुपमा ग्यातोकु कोजीले पनि आफ्नो मत खसाले ।

कप्तान महर्जनको पहिलो रोजाईमा पोर्चुगेली सुपरस्टार रोनाल्डो थिए भने म्यानचेस्टर सिटीका केभिन डे ब्रुयनलाई उनले दोस्रो स्थानमा राखेका थिए । तेस्रो स्थानमा उनले फ्रान्सका एन्टोइन ग्रिजम्यानलाई भोट गरे । उत्कृष्ट खेलाडी चुनिएका मोड्रिच उनको शीर्ष ३ मै अटाएनन् ।

त्यस्तै प्रशिक्षक कोजीको शीर्ष ३ मा पनि मोड्रिचले स्थान बनाउन सकेनन् । कोजिको पहिलो स्थान चेल्सीका स्टार एडेन हाजार्डले प्राप्त गरे भने दोस्रो स्थान ग्रिजम्यानले । कोजिले आफ्नो तेस्रो स्थानमा रोनाल्डोलाई भोट गरेका थिए ।

नेपालबाट पत्रकारतर्फ द काठमाडौं पोस्टका खेलकुद प्रमुख रितेश रिजालले मत दिएका थिए । उनले शीर्ष स्थानमा विजेता लुका मोड्रिचलाई मत दिँदै दोस्रोमा रोनाल्डो र तेस्रो स्थानमा मेसीलाई मत दिए ।