काठमाडौं (हाम्रो खेलकुद) – पाँच वर्षपछि हुन लागेको सहिद स्मारक ‘ए’ डिभिजन लिग उद्घाटन लगत्तै स्थगित हुने भएको छ । नेपाली राष्ट्रिय टोलीले बंगलादेशमा आयोजना हुने बंगबन्धु गोल्डकपमा भा लिने पक्का भएपछि अखिल नेपाल फुटबल संघ (एन्फा) ले बंगबन्धु भर ‘ए’ डिभिजन लिग स्थगित गर्ने निर्णय गरेको हो ।

क्लवसँगको समन्वयसँगै एन्फा पदाधिकारी र लिग कमिटीको सोमबारको बैठकले बंगबन्धु अवधिकर लिग स्थगित गर्ने निर्णय गरेको हो । राष्ट्रिय टोलीका खेलाडीहरु बंगबन्धुमा व्यस्त हुने भएकाले त्यस अवधिभरका लागि लिग स्थगित गर्ने निर्णय एन्फाले गरेको हो । असोज १३ गते लिग उदघाटन भएपछि १४ गते नेपाली टोली बंगलादेश प्रस्थान गर्नेछ ।

लिगको उद्घाटन खेलमा विभागिय त्रिभुवन आर्मी क्लब र न्युरोड टिम एनआरटीबीच खेल हुनेछ । ‘ए’ डिभिजनका १४ क्लबमध्ये ६ क्लबमा राष्ट्रिय खेलाडी रहेका छन् । लक्ष्मी मनाङ मस्र्याङ्दी क्लबले राष्ट्रिय टोलीका सबैभन्दा धेरै ५ खेलाडी अनुबन्ध गरेको छ । त्रिभुवन आर्मी क्लब र थ्री स्टार क्लबमा समान ४ राष्ट्रिय खेलाडी छन् ।

नेपाल पुलिस क्लब र च्यासल युथ क्लबमा समान २ राष्ट्रिय खेलाडी रहेका छन् । एपिएफ क्लबका १ खेलाडी राष्ट्रिय टोलीमा छन् । बंगबन्धुका लागि राष्ट्रिय टोलीको प्रशिक्षण आजबाट सुरु हुने भएको छ । दुई वर्ष अघिको बंगबन्धु गोल्डकप च्याम्पियन नेपालले यो संस्करणमा अन्तिम समयमा आएर सहभागिता निश्चित गरेको हो ।

च्याम्पियन बन्दा पाउनुपर्ने पुरै रकम ५० हजार डलरमध्ये २५ हजार डलरमात्रै पाएपछि नेपालले बंगबन्धु गोल्डकप नखेल्ने अल्टिमेटम दिदा बंगलादेश फुटबल फेडेरेसनले अपुग रकम पुरा गरेसँगै नेपालले बंगबन्धु खेल्ने भएको थियो । प्रतियोगिता असोज १५ देखि २६ गतेसम्म बंगलादेशमा हुनेछ । बंगबन्धु गोल्डकपमा नेपाल समूह ‘ए’ मा परेको छ । यो समूहमा नेपालसँगै प्यालेस्टाइन र ताजिकिस्तान छन् ।