म्याड्रिड (एजेन्सी) – स्पेनिस लिग अन्तर्गत मंगलबार राती एटलेटिको म्याड्रिडले घरेलु मैदानमा हुएस्कालाई ३-० ले पराजित गरेको छ । खेलको सबै गोल पहिलो हाफमा नै सम्भव भएको थियो ।

लिगमा केहि कमजोर सुरुआत गरेको एटलेटिकोले मंगलबार भने उत्कृष्ट सुरुआत पायो । यसै साता हुने डर्बीका लागि प्रशिक्षक डिएगो सिमिओनीले साउल निगुएज, रोड्रीगो र जानफ्रानलाई विश्राम दिएपनि त्यसले असर भने परेन । पूर्ण दबाब बनाएको पहिलो हाफमा डिफेन्डर जोसे जिमिनेज चोट लाग्दै मैदान छाड्नु भने दुखद रहयो ।

एटलेटिकोका लागि एन्टोइन ग्रिज्मनले १६ औं मिनेटमा सहजै गोल गर्दै खाता खोलेका थिए । त्यसको १५ मिनेटमा थोमस पार्टेले लामो दुरीबाट गरेको शक्तिशाली प्रहार गोलमा परिणत भएपछि अग्रता दोब्बर भएको थियो । ३५ औं मिनेटमा हुएस्काका गोलरक्षक एक्सल वेर्नर र एटलेटिको फरवार्ड एन्जल कोर्रिया दुवैले कोकेको पास लिन अगाडी बढ्दा चुकेपछि उक्त पास नै गोलमा परिणत भएको थियो ।

यस जितसँगै एटलेटिको तेस्रो स्थानमा उक्लिएको छ । शीर्ष दुई स्थानमा महारथी रियल म्याड्रिड र बार्सिलोना नै कायम छन् । दुवै टोलीले अहिलेसम्म कुनै खेलमा पराजय भोगेका छैनन् । हारसँगै हुएस्का भने जितविहिन अहंदै १८ औं स्थानमा झरेको छ ।