काठमाडौं (हाम्रो खेलकुद)– यू–१८ नेपाली राष्ट्रिय महिला टिमका मुख्य प्रशिक्षक हरिओम श्रेष्ठले साफमा मुख्य लक्ष्य उपाधि नै रहेको बताएका छन् । यू–१८ महिला साफ च्याम्पियनसिपका लागि नोपली टोली बुधबार भुटान प्रस्थान गर्नुअघि प्रशक्षिक श्रेष्ठले तयारी राम्रो रहेकाले लक्ष्य उपाधि जित्नु नै रहेको बताएका हुन् ।

‘टिमको तयारी राम्रो रहेको छ । आक्रमक रुपमा टोली बलियो बनेको छ । राष्ट्रिय टोलीका खेलाडीहरु पनि समावेश रहेकाले टिमको मनोबल उच्च बनेको छ । यसले पनि टिमलाई सहयोग पुग्दछ ’ प्रशिक्षकश्रेष्ठले भने, ‘बंगलादेश केही बलियो टोलीको रुपमा देखिएको छ । तर, हामी जित अनि उपाधिकै लागि खेल्नेछौं । लामो तयारीले पनि खेलाडी पनि आत्मविश्वासी देखिएका छन् । टिमले उपाधि जित्न सक्नेमा म आशावादी छु ।’

बंगलादेशलाई पराजित गर्ने योजना बुनेका छौंः कप्तान सरु

नेपाली यू–१८ महिला राष्ट्रिय टिमका कप्तान सरु लिम्बुले साफमा पाकिीस्तान भन्दा पनि बंगलादेशलाई पराजित गर्ने योजना रहेको बताएकी छन् ।

बुधबार यू–१८ महिला साफ च्याम्पियसिपका लागि भुटान प्रस्थान गर्नुअघि कप्तान सरुले बलियो प्रतिद्धन्द्धी बंगलादेशलाई पराजित गर्दै अघिल्लो चरणमा स्थान बनाउने योजना रहेको बताएकी हुन् ।

‘हाम्रो लागि अहिले पाकिस्तानभन्दा पनि बंगलादेश बलियो प्रतिद्धन्द्धी हो । बंगलादेशले पछिल्लो समयमा महिला फुटबलमा प्रगति गर्दै आएको छ । हामीले अन्तिम राउन्डमा मात्रै बंगलादेशसँग खेल्ने तालिका छ । हामी बंगलादेशमाथि स्तब्धपूर्ण नतिजा निकालेर दोस्रो चरण पुग्ने योजनामा हुनेछौं ’ कप्तान सरुले भनिन्, ‘टिमले त्यही अनुसार तयारी गरिरहेको छ । खेलाडीहरुले प्रशिक्षणमा निक्कै मिहेनत गरेका छन् । अन्तर्राष्ट्रिय प्रतियोगिता खेलेका खेलाडीहरु पनि टिममा रहेकाले पनि टिमको मनोवल उच्च रहेको छ । सिनियर खेलाडीको अनुभवले पनि टिममा परिवर्तन ल्याउन सक्दछ ।’

भुटानमा हुने यू–१८ महिला साफ च्याम्पियनसिपका लागि नेपाली टोली बुधबार त्यसतर्फ प्रस्थान गरेको छ । नेपालले समूह ‘बी’ पाकिस्तान र बंगलादेशसँग खेल्नेछ ।

शुक्रबार पाकिस्तानसँग खेल्दै नेपाली टोलीले साफको यात्रा सुरु गर्नेछ । नेपालले बंगलादेशसँग अक्टुबर २ मा प्रतिस्पर्धा गर्नेछ । अर्को समूअमा भुटान, माल्दिभ्स र भारत छन् । राउन्ड रोविन लिगपछि समूहका शीर्ष २ टोली अन्तिम चारमा पुग्नेछन् ।