काठमाडौं (हाम्रो खेलकुद)– पल्सर सहिद स्मारक ए डिभिजन लिगको सबै तयारी पुरा भएको अखिल नेपाल फुटबल संघ (एन्फा) ले जनाएको छ । एन्फाले बिहीबार सातदोबाटोस्थित मुख्यालयमा पत्रकार सम्मेलनमार्फत झन्डै पाँच वर्षपछि शुरु हुन लागेको लिगको सबै तयारी पुरा भएको जानकारी दिएको हो ।

लिगको उद्घाटन खेल शनिबार न्यु रोड टिम (एनआरटी) र विभागीय टोली त्रिभुवन आर्मी क्लबबीच हुनेछ । खेल सातदोबाटोस्थित एन्फा कम्प्लेक्सको कृतिम मैदानमा दिउसो ३ः०० बजेशुरु हुनेछ ।

लिगको उद्घाटन दौरान दक्षिण एसियाली रिजनल डेभलपमेन्ट अफिसर प्रिनस रफसको पनि उपस्थिति हने एन्फाले जनाएको छ । उद्घाटन अघि नै एन्फाले सामाजिक उत्तरदायित्वको बहन गर्दै प्रतियोगितामा ‘रेड कार्ड टु ड्रग्स’ भन्ने नारामा करिब ४५ मिनेट सांगित कार्यक्रम हुने बताइएको छ ।

लिग कमिटिका संयोजक विज्ञानराज शर्माले लिगलाई व्यवस्थित र फिक्सिङमुक्त बनाउन खेल हुने दुवै मैदानमा सिसिटीभी क्यामरा जडान गरिएको र यस विषयमा क्लबका खेलाडी तथा अफिसियलसँग एन्फा इन्टिग्रिटी अफिसरबाट निरन्तर छलफल भैरहने बताएका छन् ।

एन्फाका महासचिव इन्द्रमान तुलाधरले एनआरटी र आर्मी बीचको खेलपछि दोस्रो दिन संकटा क्लब र सरस्वती युवा क्लबबीच खेल हुने र त्यसपछि अर्को सुचना जारी नभएसम्म लिग स्थगित हुने बताए ।

‘नेपालले बंगबन्धु गोल्डकपमा प्रतिस्पर्धा गर्ने कारण लिग प्रभावित हुने भएको हो । हामी ६ अक्टोवरसम्म नेपालको खेललाई कुर्नेछौं । ६ तारिखपछि आउने निर्णय अनुसार क्लबलाई ७२ घन्टाभित्रै जानकारी गराउने हाम्रो योजना हुनेछ ’ महासचिव तुलाधरले भने, ‘दशै अघि पहिलो राउन्डको खेलहरु सकाउने हाम्रो योजना छ । त्यही अनुसार हामी अर्को खेल तालिका सार्वजनिक गर्नेछौं ।’

उनले यसपटक क्लबको तयारीलाई असर नपर्ने गरी नयाँ तरिकाबाट लिग शुरुवात गर्न लागेको बताए । ‘पहिले दिन दिनै लिग हुने गर्दथ्यो । यसपटक हामीले एक टिमलाई हप्तामा दुई पटक लिग खेलाउने प्रयास थालेका छौं,उनले भने ,’यसो हुन सकेन लिग, नकआउटर अन्य प्रतियोगिता पनि खेल्न पाउनेछ ।’

रेलिगेसन नहुने लिग पुस ३० गतेसम्म हुनेछ । राउण्ड रोविन लिगको आधारमा हुने प्रतियोगितामा कुल ९१ खेल हुनेछ ।

लिगमा थ्री स्टार, मनाङ मस्र्याङ्दी, नेपाल पुलिस, एपीएफ, आर्मी, जावलाखेल युथ क्लब, फ्रेन्ड्स क्लब,संकटा,मछिन्द्र क्लब, सरस्वती युथ क्लब, च्यासल युथ क्लब, न्युरोड टिम ९एनआरटी० ,ब्रिगेड ब्वाइज र हिमालयन शेर्पा क्लब रहेका छन् ।

लिगको विजेताले ५० लाख पाउने जानकारी दिएको हो । यस्तै लिग विजेता टोलीले एएफसी एसियन कप फुटबलमा सहभागिता जनाउन पाउनेछन् । लिगको उपविजेताले ३५ लाख र तेस्रोले २५ लाख पाउने जनाएको छ ।

चौथोले १५ लाख, पाँचौले ७ लाख र छैटौंले ५ लाख पाउनेछन् । फेयर प्ले टिमले एक लाख पाउने छन् । प्रत्येक खेल जिते बापत एन्फाले क्लबलाई ५० हजार तथा म्यान अफ दि म्याच खेलाडीलाई १० हजार दिने छन् ।