काठमाडौं (हाम्रो खेलकुद) – घरेलु फुटबलको मेरुदन्ड मानिने पल्सर शहिद स्मारक ‘ए’ डिभिजन लिग फुटबल भन्डै पाँच वर्षपछि शुरु हुदैछ । २०७० मनाङ लिग च्याम्पियन बनेयता शहिद स्मारक लिगले निरन्तरता पाउन सकेको थिएन । तर, त्यसपछि अखिल नेपाल फुटबल संघ (एन्फा) ले राष्ट्रिय लिगको अवधारणा अघि सारेको थियो ।

जसमा रुस्लान थ्री स्टार च्याम्पियन बन्न सफल भएको थियो । त्यसयता एन्फामा विभिन्न आरोह–अवरोह भएपछि घरेलु फुटबल नै शुन्य प्राय भएको थियो । एन्फामा नयाँ नेतृत्वले लिग आयोजना गर्न सफल भएका हो । लिगको उद्घाटन खेलमा न्युरोड टिम (एनआरटी) ले विभागीय टोली त्रिभुवन आर्मी क्लबको सामना गर्दैछ । खेल सातदोबाटोस्थित एन्फा कम्प्लेक्सको खेल मैदानमा दिउसो तीन बजेपछि शुरु हुनेछ ।

लिग शुरु हुनुअघि एन्फाले प्रि–म्याच पत्रकार सम्मेलनको आयोजना गरेको थियो । ‘ए’ डिभिजन लिगमा सहभागी सबै १४ क्लबका प्रशिक्षकले आफ्नो क्लबको तयारी बारे धारणा राखेका थिए । हामीले सबै १४ प्रशिक्षको भनाईलाई संक्षिप्तमा समेटेका छौं ।

महेश्वर मुल्मी (प्रशिक्षक, एनआरटी) -सर्वाधिक पखाईमा रहेको लिगलाई हामीले औसतमा तयारी गरेका छौं । टुडिखेलको मैदानमा हामीले औसतमै तयारी गरेका छौं । हाम्रो लक्ष्य लिगको चौथो देखि छैटौ सम्म रहने हो । हामीले सामान्य खेलाडीलाई टिममा समेटका छौं । केही खेलाडीहरु ‘ए’ डिभिजन लिग खेलेका रहेपनि अन्य सबै लिगका लागि नयाँ खेलाडी नै रहने छ । ‘बी’ डिभिजन लिग खेलेका दुई जना मात्रै टिममा रहेका छन् ।

अनन्त थापा (प्रशिक्षक, नेपाल पुलिस क्लब)– लिगका लागि नेपाल पुलिस क्लब जहिले पनि तयार छ । पुलिस क्लब लिगको दावेदार टोली हो । हामीले लिगलाई मध्यनजर गर्दै २ महिनाअघिबाट प्रशिक्षण शुरु गरेका थियौं । टिममा यसपटक युवा खेलाडीले भरिएको छ । सबै २५ वर्ष मुनिका छन् । ४ वर्षपछि लिग हुनु राम्रो हो । प्रशिक्षकको रुपमा पनि लिग जित्न चाहन्छु । च्यान्पियन बन्ने लक्ष्य छ ।

उजेन श्रेष्ठ (ब्रिगेड ब्वाइज क्लब)- ब्रिगेड ब्वाइजले यस लिगबाट नयाँ खेलाडी जन्माउनेछ । ‘ए’ डिभिजनका खेलाडी छैनन् । टिम जुनियर खेलाडीले भरिएका छन् । हामीले विदेशी खेलाडीबाट पनि अपेक्षा गरेका छौं । हाम्रो योजना लिगमा शीर्ष ८ भित्र रहनु हो । टिमलाई प्रशिक्षण दिन पाएकोमा खुशी छु ।

नरेश थापा (सहायक प्रशिक्षक, जावलाखेल युथ क्लब)- हामीले लिगका लागि करिव दुई अघिबाट आफ्नै मैदानमा प्रशिक्षण थालेका थियौं । टिममा उमेर समूह र नयाँ खेलाडीको बाहुल्यता रहेको छ । लिगका लागि हामीले १९ खेलाडी मात्र अनुबन्ध गर्न सकेका छौं । स्ट्राइकिङ र मिडफिल्डमा केही समस्या देखिएको छ । यसलाई हामी सुधार्नेछौं । लिगमा हाम्रो लक्ष्य सातौ पोजिसन सम्म आउने रहेको छ ।

रमेश महर्जन (प्रशिक्षक, फ्रेन्ड्स क्लब)- डेढ महिना अघिबाट बाग्मती नदी किनारमा प्रशिक्षण गरिरहेका छौं । हामीले चार विदेशी खेलाडी अनुबन्ध गरिसकेका छौं । त्यसमा एक दक्षिण एसियाली राष्ट्रको खेलाडीको रुपमा बंगलादेशका खेलाडीलाई अुनबन्ध गरेका छौं । टिममा यू–१८ का खेलाडीहरुको बाहुल्यता रहेको छ । हाम्रो लक्ष्य शीर्ष ६ अथवा शीर्ष आठ भित्र रहने हो ।

राजुकाजी शाक्य (प्रशिक्षक, च्यासल युथ क्लब)– ट्रेनिङ राम्रो भएको छ । लिगकै अभ्यासका लागि हामीले भारतमा प्रतियोगिता पनि खेल्यौ । यसले टिममा मनोवल उच्च बनाएको छ । तर, टिम कम्बिनेसन मिल्न सकिरहेको छैन । हामी यसलाई सुधार्ने छौं । विदेशी खेलाडी अुनबन्ध गर्ने प्रयास गरिरहेका छौं । लिगमा राम्रै गर्ने योजना छ । सबै टोलीलाई टफ फाइट दिनेछौं ।

सल्यान खड्गी (प्रशिक्षक, संकटा)- लिगका लागि टिम तयार छ । टिममा अनुभवी र जुनियर खेलाडीको समिश्रण छ । हाम्रो लक्ष्य शीर्ष ५ भित्र पर्ने रहेको छ । हामीले एक महिनाअघिबाट तयारी थालेका छौं । नकआउटमा झै राम्रो नतिजा ल्याउने प्रयास हुनेछ ।

मेघराज केसी (प्रशिक्षक थ्री स्टार)- लिगमा फर्किन पाउँदा खुशी छु । एन्फाको गल्तीकै कारण २ वर्ष फुटबल बाहिर बस्यौं । १० महिनाबाटै तयारी छ । दाबेदारको रुपमा हेर्दा प्रेसर हुन्छ लिग जित्ने कोचको रुपमा उदाउन चाहन्छु । टार्गेट ठूलो छैन ग्याप लामो छ । विपक्षीको बारेमा जानकार छैनौ । पहिलो र दोस्रो राउन्डपछि हामी टार्गेट बनाउनेछौं ।

धनेश्वर प्रजापति (प्रशिक्षक, मच्छिन्द्र क्लब) छोटो समयमा तयारी छ । टिमले राम्रो मैदानमा तयारी गर्न पाएको छैन । नयाँ र पुराना खेलाडीको समिश्रण छ । मिड टेबल हाम्रो टार्गेट हो ।

राजेन्द्र तामाङ (प्रशिक्षक, एपीएफ)- डेढ़ महिनाबाट तयारी शुरू गरेका छौं । नयाँ संरचनाको फुटबलबारे अभ्यस्त पार्ने प्रयास छ । टार्गेट तेस्रो स्थान आदित्य चौधरी मात्रै राष्ट्रिय टिममा छ । यसअघि मैले थ्री स्टारलाई राष्ट्रिय लिग च्याम्पियन बनाएको थिए । अहिले अर्काे क्लबलाई च्याम्पियन बनाउने योजना बनाएको छु ।

सुवास लिम्बु (प्रशिक्षक, हिमालयन शेर्पा)- २० दिन देखि नियमित प्रशिक्षणमा छौं । मलाई प्रशिक्षक चुनिदिनु भएकोमा म एन्फा र हिमालयन शेर्पा क्लबलाई धन्यवाद दिन चहान्छु । सिनियर टिममा प्रशिक्षण पहिलो हुनेछ । यसअघि मैले उमेर समूहको टिमलाई हेरेको थिए । राम्रो मैदानमा प्रशिक्षण गर्न पाएका छैनौ । टिम सेट मिलाउन बाँकी छ । टप सिक्स हाम्रो लक्ष्य हो । कर्ण लिम्बु र दुई विदेशी खेलाडीलाई टिममा अनुबन्ध गरेका छौं । कर्ण र विदेशी खेलाडीबा हामीले अपेक्षा राखेका छौं ।

नवीन न्यौपाने (प्रशिक्षक त्रिभुवन आर्मी क्लब)– विभागीय टोली सधैं तयार छ । सबै गेम महत्वपूर्ण छ । आर्मी अहिलेसम्म लिग च्याम्पियन बन्न सकेको छैन । लिग जित्ने लक्ष्य छ । नयाँ इतिहास बनाउने योजनामा हुनेछौं । विदेशी खेलाडीले गर्दा प्रभाव पर्छ टीम बलियो हुन्छ । टप फाईट दिएर एट्याक गर्ने हो ।

प्रदीप नेपाल (प्रशिक्षक, सरस्वती क्लब)- डेढ़ महिनाबाट प्रशिक्षण गरेका छौं । टप सिक्स हाम्रो लक्ष्य हो । विदेशी ३ खेलाडी टिममा अनुबन्ध गरिसकेका छौं । राजुकुमार घिसिङ जस्ता पुराना खेलाडीको साथ टिमलाई छ ।

टोपे फुजा (प्रशिक्षक, मनाङ–मस्र्याङ्दी क्लब)- टिमको तयारी राम्रो छ । २ सातादेखि नियमित अभ्यास गर्दै आएका छौं खेलाडीहरु राम्रा छन् । उनीहरुले प्रशिक्षणमा निकै मिहेनत गरेका छन् । ग्रास रूटमा धेरै काम भएका छन् ।