काठमाडौं (हाम्रो खेलकुद)– फुटबल प्रशिक्षणबाट अलग नरहनेपनि तत्काल अखिल नेपाल फुटबल संघ (एन्फा) मा गएर काम गर्ने सम्भावना भने कम रहेको प्रशिक्षक राजुकाजी शाक्यले बताएका छन् ।

नेपालले दक्षिण एसियाली खेलकुद (तत्कालिन साफ र हालको साग) मा दुई पटक स्वर्ण पदक जित्दा दुवै टोलीमा रहेका २ खेलाडी मध्ये एक शाक्यले आफ्नो खेल र प्रशिक्षण जीवनमा पटक पटक अपमानित हुनु परेको बताएका छन् ।

‘फुटबल खेलेर पछुताउनु परेको अवस्थामा पनि कुनै कुनै बेला पुगेको छु’ एक्सन स्पोर्टस्को फेयर प्लेमा शाक्यले भनेका छन्, ‘पटक पटकको अपमानका कारण मैले त्यस्तो भनेको हु । खेलाडी र प्रशिक्षकका रुपमा पटक पटक मैले त्यस्तो महसुस गर्नुपरेकोले कहिले काही त्यस्तो लाग्छ । तर, फुटबलबाहेक मेरो जीवनमा अरु केही छैन । ‘

सन् १९८४ र १९९३ मा नेपालले साफमा स्वर्ण पदक जित्दा शाक्य र उमेश प्रधान टोलीका सदस्य थिए । प्रधान अहिले सपरिवार अमेरिकामा छन् । आफुलाई फुटबल पागलको सज्ञा दिदै शाक्यले अहिलेको एन्फा कार्यसमितिको काम कारवाही सन्तोषजनक नै देखिएपनि समय समयमा देखिने विवादित प्रसंगले दुःख लाग्ने बताए ।

‘हिजो आफ्नो खुसी भयो भनेर परिवर्तनको नारासहित उहाँहरु आउनु भएको छ,’ शाक्यले भने, ‘आज फेरि प्रशिक्षक जानु पर्ने ठाँउमा पदाधिकारी आफै सेमिनारमा जानु हुन्छ भन्ने यो परिवर्तन भयो र ? साफ च्याम्पियनसिपसम्म आफ्नो करार हुँदा हुँदै एन्फाले विना जानकारी हटाउँदा अपमान महसुस गरेको उल्लेख गर्दै शाक्यले भने, ‘मलाई जिम्मेवारी हटाएको एउटा पत्र दिएको भए हुन्थ्यो । तर विना जानकारी त्यस्तो गरिएको ले राम्रो लागेन । ठिक छ हटाउने उहाँहरुको अधिकारी हो । मैले यसलाई सामान्य रुपमा लिने प्रयास गरेको छु ।’

अहिलेको एन्फा नेतृत्वले निर्वाचनमा अर्को पक्षमा लागेकै कारण आफुमाथि अन्याय गरेको प्रष्ट भएको पनि शाक्यले बताए । ‘पदाधिकारीले छलफलका क्रममा पनि अर्को पक्षलाई सहयोग गरेका कारण आफुहरुले सहयोग गर्न नसक्ने बताएका छन्,’ उनले थपे, ‘मलाई पहिला नै थाहा भइसकेको थियो । उहाँहरुले चुनाव जितेपछि मैले काम गर्ने वातावरण हुनेछैन । सायद अब फर्केर काम गर्ने अवस्था हुँदैन ।’

उनले लामो समयपछि लिग आयोजना हुनुलाई सकारात्मक कदमको रुपमा लिनुपर्ने उल्लेख गर्दै च्यासल युथ क्लबका प्रशिक्षक शाक्यले भने, ‘लिग र एन्फा सञ्चालनलाई अलग अलग चलाउने हो भने सायद लिग रोकिने अवस्था बन्दैन । अब लिग नरोकिने गरि हरेक वर्ष आयोजना होस् ।’

शाक्यसँगको अन्तवार्ता एक्सन स्पोर्टस्को फेयर प्लेमा दिउँसो ३ः३० र पुनः प्रसारण साँझ ८ः०० बजे हुनेछ ।