काठमाडौं (हाम्रो खेलकुद)– लामो समयपछि सहिद स्मारक ए डिभिजन लिग आयोजनाले सम्बन्धित सबै उत्साहित भएको आफुले पाएको लिग निर्देशक सञ्जिव मिश्रले बताएका छन् । अखिल नेपाल फुटबल संघ (एन्फा) को आयोजनामा झन्डै ५ वर्षपछि असोज १३ गते ए डिभिजन लिग सुरु भएको थियो ।

तर, राष्ट्रिय फुटबल टोलीले बंगलादेशमा जारी बंगबन्धु गोल्ड कपमा भाग लिइरहेका कारण अहिले लिग स्थगित छ । २०७० यता ए डिभिजन लिग आयोजना भएको यो पहिलो पटक हो । एन्फाले यसपटक लिग आयोजनाका लागि अलग्गै लिग समिति बनाएको छ । पूर्व राष्ट्रिय खेलाडी विज्ञानराज शर्मा संयोजक रहेको समितिमा मिश्र निर्देशक छन् ।

लिगको अलग्गै समिति भएकाले खुला र दबाबमुलक काम गर्न सकिने अनुभव भएको उल्लेख गर्दै मिश्रले एक्सन स्पोर्टसको फेयर प्लेमा भनेका छन्, ‘यो अभ्यासले पक्कै पनि काम गर्न सहज भएको छ ।’ मिश्रले फिफा फरवार्ड पोग्रामका कारण आर्थिक सहयोग आउने भएकाले अब लिग सञ्चालनमा समस्या नहुने बताए ।

भौतिक पूर्वाधार विकासमा जोड नदिने हो भने फुटबल विकास सम्भव नहुने जनाउँदै मिश्रले अहिलेको एन्फा नेतृत्वको आगमनसँगै फुटबलले गति लिएको बताएका छन् । मिश्र २०६३ यता लगातार विभिन्न भूमिकामा काम गर्दै आएका छन् । फुटबलमा रेफ्रीको भूमिकामा उजुरी गर्न नपाइनेमा जोड दिदै हरेक खेलमा विमती राख्दा प्रतियोगिता गर्न नसकिने उनले बताएका छन् ।

सामाजिक रुपमा स्थापित भएका अहिलेका क्लबहरु आउने दिनेमा व्यावासायिक बन्नका लागि क्लब लाइसेन्सिङमा अनिवार्य रुपमा जानुपर्नेमा मिश्रले जोड दिएका छन् । विगतमा राजधानीमा स्थानिय खेलाडीहरुले खेल्ने गरेकोले रंगशालामा फुटबल हेर्नेहरुको उल्लेख उपस्थिति रहने गरेको स्मरण गर्दै मिश्रले समय अनुसार सबै परिवर्तन आएको बताए ।

मिश्रसँगको अन्र्तवार्ता एक्सन स्पोर्टसको फेयर प्लेमा शनिबार दिउँसो ३ः३० बजे र पुनः प्रसारण साँझ ८ः०० बजे हुनेछ ।