काठमाडौं (हाम्रो खेलकुद) – नेपालले आज साफ यू–१८ महिला फुटबल च्याम्पियनसिपको फाइनलमा बलियो प्रतिद्धन्द्धी बंगलादेशसँग प्रतिस्पर्धा गर्दैछ ।

भुटानको थिम्पुमा जारी साफ यू–१८ महिला च्याम्यिनसिपको खेल नेपाली समयअनुसार साँक्र ६ः४५ बजेपछि चाङलिमिथाङ रंगशालामा हुनेछ ।

यि दुई टोलीले समूह चरणमा पनि प्रतिस्पर्धा गरिसकेका कारण एक अर्कासँग परिचित छन् । दुवै टोलीको उपाधि जित्ने लक्ष्य हुदा एक अर्कासँग सचेत भएर खेल्ने पक्का छ । नेपाल समूह चरणमा बेहारेको हारको बदला लिदै च्याम्पियन बन्ने लक्ष्यसहित मैदान उत्रनेछ ।

नेपाल समूह चरणमा बंगलादेशसँग २–१ ले पराजित भएको थियो । नेपालका लागि रश्मी कुमारी घिसिङले एक गोल गरेकी थिइन् । तर, फाइनल र लिग चरणका बिल्कुलै फरक हुनेछ । नेपालसँग रेखा पौडेल, रश्मी कुमारी घिसिङ, मन्जली योन्जन र कप्तान सरु लिम्बुको साथ रहनेछ । यता, नेपालले फाइनलमा बंगलादेशकी सिरत जाहान सोप्ना, मार्जिया र कृष्णा रानी सरकार जस्ता खेलाडीलाई रोक्नुपर्ने हुन्छ ।

नेपालका मुख्य प्रशिक्षक हरिओम श्रेष्ठले जित्ने मानसिकताका साथ नै मैदान उत्रने बताएका छन् । ‘हामीले सेमिफाइनलमा भारतजस्तो बलियो टोलीलाई पराजित गरेर फाइनलमा आएका छौं । भारतमाथिको जितसँगै टिमका मनोवल उच्च रहेको छ ।’ प्रशिक्षक हरिओमले भारतमाथिको जितपछि पोस्ट म्याच पत्रकार सम्मेलनमा भनेका छन्, ‘हामीले यसै प्रतियोगिताको लागि प्रशिक्षण शुरु गर्दा नै उपाधि जित्ने मानसिकताले प्रशिक्षण गरेका थियौं । बंगलादेशलाई पराजित गर्दै उपाधि जित्नेमा विश्वस्त छु ।’

नेपालले सेमिफाइनलमा भारतलाई पेनाल्टी सुटआउटमा ३–१ ले पराजित गरेर फाइनलमा स्थान बनाएको थियो ।

यता, बंगलादेशले पछिल्लो समय महिला फुटबलमा निकै राम्रो प्रगति गरिरहेको छ । यस्तोमा बंगलादेशको लक्ष्य फेरि एकपटक नेपाललाई पराजित गर्दै च्याम्पियन बन्ने लक्ष्यमा मैदान उत्रनेछ । बंगलादेशका सिरत जाहान सोप्ना, मार्जिया र कृष्णा रानी सरकारजस्ता प्रतिभावना खेलाडीले जुनसकै बेला नेपाललको रक्षापङ्ति तोड्न सक्छ ।

आजै तेस्रो स्थानको लागि आयोजक भुटानले भारतसँग दिउसो ३ः१५ बजेपछि प्रतिस्पर्धा गर्नेछ ।