काठमाडौं (हाम्रो खेलकुद) – सहिद स्मारक ए डिभिजन लिग अन्तर्गत सिग्नेचरसिग्नेचर मनाङ मर्स्याङदी क्लबले  ब्रिगेड ब्वाइज क्लबलाई ३-१ ले पराजित गरेको छ । ब्रिगेड ब्वाइजले पहिलो हाफमा १-० को अग्रता लिएपनि मनाङले दोस्रो हाफमा पुनरागमन गर्दै जित दर्ता गरेको हो ।

ब्रिगेड ब्वाइजका लागि रजत तिवारीले खेलको २९ औं मिनेटमा सुन्दर गोल गर्दै सुरुवाती अग्रता दिलाए । रजतले पेनाल्टी क्षेत्रबाहिरबाट गरेको शक्तिशाली प्रहार दर्शनीय गोलमा परिणत भएको थियो । खेलमा मनाङले दबाब सिर्जना गरेपनि अग्रता भने बनाउन सकेन । पहिलो हाफमा मनाङको आधा दर्जनभन्दा बढी प्रयास खेर गएको थियो ।

पहिलो हाफको इन्ज्युरी समयमा अन्जन विष्टको हेडर पोस्टभन्दा थोरै माथिबाट बाहिरिएको थियो । त्यसको पाँच मिनेटअघि गोलरक्षक सागर रायले अन्जनको हेडरलाई उत्कृष्ट ढंगले बचाएका थिए । विदेशी खेलाडी आडेलाजा सोमिडे र आफिज ओलावालेको जोडीले अपेक्षित प्रदर्शन गर्न सकिरहेका छैनन् । सुजल श्रेष्ठले पनि पेनाल्टी क्षेत्रबाहिरबाट दुई प्रयास खेर फालेका थिए ।

दोस्रो हाफको सुरुआतमै मनाङले बराबरी गोल फर्काएको थियो । पेनाल्टी क्षेत्र बाहिरबाट हेमन गुरुङको प्रहार फरवार्ड आडेलाजालाई लाग्दै गोलमा परिणत भएको थियो । छैटौं मिनेटमा कर्नरबाट आएको रिबाउन्डमा कमल श्रेष्ठले झन्डै ३५ यार्ड टाढाबाट गरेको प्रहार गोलरक्षक सागरले बचाए । ५७ औं मिनेटमा मनाङले खेलमा अग्रता लियो । प्रवेश कुँवरको थ्रु बलमा ब्रिगेड ब्वाइजका कप्तान दिलेन लोक्तान बिट भएपछि ओलावालेले पेनाल्टी क्षेत्र भित्रबाट गरेको प्रहार गोलरक्षकलाई लाग्दै गोल भएको थियो ।

ओलावालेले ७७ औं मिनेटमा पेनाल्टी क्षेत्रभित्र कर्नरबाट आएको रिबाउन्डलाई पोस्टको दिशा दिन सकेनन् । ब्रिगेड ब्वाइजले अन्तिम समयतिर दुई अवसर सिर्जना गरेको थियो । अनुप गुरुङको हेडर विशाल श्रेष्ठले बचाए भने ऋतिक खड्काको प्रहार पोस्टबाहिर गएको थियो । ओलावालेले इन्ज्युरी समयको पहिलो मिनेटमा हेमन गुरुङको क्रसमा ६ यार्ड बक्स भित्रबाट गोल गर्न चुके । अतिरिक्त समयको चौथो मिनेटमा ओलावालेले पेनाल्टी क्षेत्र भित्रबाट सहजै गोल गर्दै जित पक्का गरे । यस जितसँगै मनाङ अंक तालिकाको शीर्ष स्थानमा पुगेको छ ।

खेलको तस्बिरहरु: विवेक सुवेदी/हाम्रो खेलकुद