बिर्तामोड (हाम्रो खेलकुद) – झापा मिडिया कपको दोस्रो संस्करण कात्तिक तेस्रो साता आयोजना हुने भएको छ । झापाको पुरानो दैनिक विवेचनाको वार्षिकोत्सवमा आयोजना हुने मिडिया कप कात्तिक १५ देखि १७ गते सम्म सञ्चालन हुने आइतबार आयोजित पत्रकार सम्मेलनमा जानकारी दिइएको छ ।

विवेचनाका समाचार सम्पादक तथा खेल संयोजक रमेश समदर्शी राईका अनुसार यसपटक नौ वटा सञ्चार गृहले भाग लिने प्रतियोगिता अर्जुनधारा ११ स्थित खेल मैदानमा हुने बताइएको छ । प्रतियोगितामा साविक विजेता सूर्योदय टेलिभिजन, उपविजेता यलम्बर टाइम्स , मेरो रेडियो, न्यु मेची टाइम्स, लोकतन्त्र पोष्ट, जनसंसद्, सनराइज एफएम, सप्तरंगी एफएम, आमसञ्चार अनलाइन, नेसनल मिडिया ग्रुप र आयोजक विवेचनाको सहभागिता रहने बताइएको छ ।

प्रतियोगितामा झापा जिल्ला फुटबल संघ र झापा जिल्ला फुटबल रेफ्री संघको प्राविधिक सहयोग रहने विवेचनाका सम्पादक हिमाल खरेलले बताए । तिहारअघि हुने मिडिया कपको पुरस्कार राशि पनि यस वर्ष बढाइएको खरेलले बताए । उनका अनुसार यस वर्ष विजेताले नगद ३१ हजार र उपविजेताले १६ हजार पाउनेछन् ।

गत वर्ष २१ हजार र १५ हजार पुरस्कार रहेको थियो । प्रतियोगितामा उत्कृष्ट खेलाडीलाई मोबाइल र उत्कृष्ट डिफेन्डर, उत्कृष्ट फरवार्ड, उत्कृष्ट मिडफिल्ड, उत्कृष्ट गोलकिपर, उत्कृष्ट प्रशिक्षक तथा प्रत्येक खेलको म्यान अफ द म्याचलाई समेत पुरस्कारको व्यवस्था गरिएको आयोजकले जनाएको छ ।

विवेचना प्रकाशन समूहका अध्यक्ष नविन खरेलको अध्यक्षतामा भएको कार्यक्रममा पूर्वअध्यक्ष तेजमणि प्रसाईं, प्रबन्ध निर्देशक सुमन शर्मा जम्मर कट्टेलले मिडिया कपका बारेमा प्रस्ट पारेका थिए ।