एजेन्सी – स्पेनी राष्ट्रिय टोलीबाट तीन गोल र बोरुसिया डर्टमुन्डबाट सात गोल । बार्सिलोना छाडेर सिजनको सुरुवातमा लोनमा जर्मन क्लब पुगेका फवार्ड पाको अल्कासेरको मुहारमा फेरी हाँसो छाएको छ ।

सन् २०१६ मा भ्यालेन्सिया छाडेर बार्सिलोना पुगेका अल्कासेरले त्यसयता ५० खेल खेले । त्यसमध्ये २२ खेलमा मात्र उनी सुरुवाती ११ मा पर्न सफल रहे । उनले दुई सिजनमा जम्मा १५ सय मिनेट खेल्न पाए । भ्यालेन्सियाबाट बार्सिलोना पुग्दा निकै आशालाग्दो करिअर बोकेका अल्कासेरको भूमिका वैकल्पिक खेलाडीभन्दा माथि उठ्न सकेन ।

क्याटलान क्लबमा खेल्ने मौका नपाउँदा उनले राष्ट्रिय टोलीमा पनि स्थान बनाउन छाडे । त्यसअघि उनी राष्ट्रिय टोलीमा पनि पर्ने गर्दथे । पछिल्लो सिजन पनि उनले राम्रो प्रदर्शन गर्दागर्दै नियमित खेल्न पाएनन् । त्यसैले यस सिजनको सुरुवातमा उनले क्लब छाड्ने नै निर्णय लिए ।

‘ म फुटबल खेल्दा खुसी हुन चाहन्छु । त्यसैले मैले बार्सिलोना छाड्नु जरुरि थियो,’ अल्कासेरले भने । उनी एक्लै भने छैनन् । अन्य यस्ता खेलाडी छन् जसले स्तर र कला हुनुका बाबजुद बार्सिलोनामा खेल्न नपाएर आफ्नो करिअर बर्बाद गरिरहेका छन् । थियागो अलाकान्ट्रा पनि त्यसैको शिकार बनेका थिए । उनले क्लब छाडेपछि अहिले बायर्न म्युनिखमा नियमित खेल्छन् भने स्पेनी राष्ट्रिय टोलीको पनि पहिलो रोजाइमा पर्दै आएका छन् ।

विगतमा थियागो मोटा र क्रिस्टियन टेलोले पनि सोहि किसिमको अभिव्यक्ति दिए । एक समय मार्क बार्टरालाई निकै सम्भावना बोकेका डिफेन्डरको रुपमा हेरिएको थियो । तर क्याम्प नोउमा मौका नपाउँदा उनी डर्टमुन्ड हुँदै अहिले बेटिसमा खेलिरहेका छन् । उनले आफ्नो खेललाई पनि सुधार गरेका छन् र राष्ट्रिय टोलीमा परेका छन् ।

गोलरक्षकको स्थानमा पनि त्यस्तै अवस्था छ । लामो समय वैकल्पिक खेलाडीको रुपमा रहेका ओइएर ओलाजाबाल र जोर्डी मासिप पनि क्लब छाडेपछि ला लिगाकै अन्य क्लबमा पहिलो रोजाईका रुपमा खेलिरहेका छन् । बार्सिलोनाले जसरी कतिपय खेलाडीको करिअर बनाएको छ त्यसक्रममा धेरै खेलाडीको बिगारेको पनि छ । मौका नपाउँदा खेलाडीले क्लब छाड्दै पश्चाताप गर्नुको विकल्प रहन्न ।