एजेन्सी – स्पेनिस ला लिगा अन्तर्गत अंक तालिकाको शीर्ष स्थानमा पुग्ने लक्ष्यसहित बार्सिलोना र सेभिल्ला भिड्दैछन् । बार्सिलोनाको घरेलु मैदान क्याम्प नोउमा सेभिल्ला आफ्नो उच्च लयलाई निरन्तरता दिने सुरमा हुनेछ ।

च्याम्पियन्स लिगमा उत्कृष्ट सुरुवात गरेको बार्सिलोनाले ला लिगामा भने त्यसैअनुसार प्रदर्शन गर्न सकेको छैन । बार्सिलोनाको लागि यो साता निकै महत्त्वपूर्ण रहेको छ । बार्साले साताको मध्यतिर इन्टर मिलानसँग च्याम्पियन्स लिग खेल र त्यसपछि अर्को साता रियल म्याड्रिडसँग एल क्लासिको खेल्नुपर्ने छ । यी तीन खेलमा अनुकुल नतिजा निकाल्न नसके प्रशिक्षक एर्नेस्टो भालभेर्डेको जागिर पनि जाने सम्भावना छ ।

प्रशिक्षक एर्नेस्टोले आफ्नो जागिर बचाउन सेभिल्लाविरुद्ध स्पष्ट जित निकाल्नु आवश्यक छ । जितले बार्सिलोना शीर्ष स्थानमा पुग्नेछ । तर सेभिल्लाले पछिल्लो समय निकै राम्रो प्रदर्शन गरेको छ । आक्रमणमा निकै बलियो रहेको टोली रक्षात्मक रुपमा पनि सफल रहेको छ । बार्सिलोनालाई केहि खेलाडीको चोटले भने समस्या पर्न सक्नेछ । अघिल्लो सिजन लिग अवधिभर १ खेलमात्र हारेको बार्सिलोनाले अहिले ८ खेल हुँदै एक पराजय बेहोरिसकेको छ ।

बार्सिलोनाले डिफेन्डर स्यामुएल उम्टिटी र थोमस भर्मालेनको साथ पाउनेछैन । क्लेमेन्ट लेङलेट आफ्नो पूर्वक्लब विरुद्ध उत्रने सम्भावना छ । सर्जी रोबर्टो फिट नहुँदा नेलसन सेमेडोले राइट डिफेन्समा खेल्नेछन् । लुइस सुआरेजले अन्तर्राष्ट्रिय ब्रेकमा विश्राम गरेका थिए । त्यसैले पनि उनले अब लय समात्ने अपेक्षा गरिएको छ । मिडफिल्डमा फिलिपे कोउटिन्हो र आर्थर पनि खेल्नेछन् ।

सेभिल्लाका ग्याब्रिएल मर्साडो चोटका कारण मैदान बाहिर नै छन् । लयमा रहेका फरवार्डद्वय बेन यडर र आन्द्रे सिल्भाले आक्रमण सम्हाल्नेछन् । एलेक्स भिडालले आफ्नो पूर्व क्लब विरूद्ध सुरुवाती रोजाइमा पर्ने छाँटकाँट देखेका छन् । रोके मसा र क्विंसी प्रोमेसले पनि मौका पाउने छन् ।

बार्सिलोनाले सिजनको सुरुवातमा भएको स्पेनिस सुपर कपमा सेभिल्लालाई २-१ ले पराजित गरिसकेको छ । पछिल्लो पटक ला लिगामा यी दुई टोली भिड्दा बार्सिलोना क्याम्प नोउमा २-१ ले विजयी रहेको थियो । लिगको खेलमा सेभिल्लाले अक्टोबर २०११ यता हार टार्न सकेको छैन । पछिल्लो ६ भ्रमणमा टोली कुनै अंक नलिई घर फर्केको छ ।

खेलको जानकारी:

खेल : बार्सिलोना विरुद्ध सेभिल्ला

प्रतियोगिता : स्पेनिस ला लिगा

मिति : अक्टोबर २०, २०१८ शनिबार

समय : नेपाली समयअनुसार मध्यरात १२:३० बजे (विहान आइतबार)