काठमाडौं (हाम्रो खेलकुद) – एएफसी यू–१९ महिला च्याम्पियन २०१९ को छनोट खेलहरु बुधबारबाट थाइल्यान्डमा शुरु हुदैछ । नेपालले बलियो प्रसितद्धन्द्धी तथा आयोजक थाइल्यान्डसँग खेल्दै प्रतियोगिताको शुरुवात गर्दैछ ।

नेपाली टोलीका मुख्य प्रशिक्षक हरिओम श्रेष्ठले बलियो थाइल्यान्डविरुद्ध बराबरीका लागि खेल्ने बताएका छन् ।  ‘थाइल्यान्ड बलियो टोली हो । हामी थाइल्यान्ड विरुद्ध बराबरीका लागि खेल्नेछौं,’ प्रशिक्षक श्रेष्ठले प्रि–म्याच पत्रकार सम्मेलनमा मंगलबार भने, ‘डिफेन्समा बढी जोड दिएर काउन्टर अट्याकमा खेल्नेछौं । हामीसँग रेखा पौडेल एक्ला स्ट्राइकर हुनेछ । हाम्रो लक्ष्य थाइल्यान्डलाई बराबरीमा रोक्न सके हामीलाई दोस्रो चरण पुग्न सहज हुनेछ ।’ उनले थाइल्यान्ड आयोजकको नाताले सोझै दोस्रो चरणलाई छनोट हुदा यसको फाइदा नेपाललाई रहेको बताए । प्रशिक्षक श्रेष्ठले भारतविरुद्धको खेल झनै महत्वपूर्ण हुने बताए ।

‘हाम्रो टिममा कुनै खेलाडी घाइते छैनन् । साफ यू–१८ दौरान केही खेलाडीहरु घाइते थिए । अहिले सबैजना रिकभर भैसकेका छन् । यो हाम्रो लागि सुखद् पक्ष हो,’ प्रशिक्षक श्रेष्ठले भने, ‘टिमवर्क नै हाम्रो टोलीको बलियो पक्ष हो । टिम सन्तुलित नै छ । सिनियर तीन राष्ट्रिय खेलाडी सरु लिम्बु, अन्जना रानामगर र मन्जली योन्जन टिममा रहेकाले टिम सन्तुलित देखिएको छ ।’

उनले एएफसीको लागि थौरे प्रशिक्षण गर्ने मौका पाएपनि साफ यू–१८ को अनुभव नै थाइल्यान्डका लागि प्रयोग हुने बताए । यस्तै उनले थाइल्यान्डको टोलीको केही फुटेजहरु हेरेको र उनीहरुमा फरवार्ड र दाया विङ्समा धेरै बलियो रहेको बताउदै उनीहरुलाई रोक्ने आफ्नो योजना रहेको सुनाए ।

प्रशिक्षक श्रेष्ठले प्रतियोगिताको पहिलो खेल सधै गाह्रो हुने बताउदै थाइल्यान्डलाई पनि गाह्रै हुने बताए । यता, थाइल्यान्डका प्रशिक्षक अरुण तुलवाटटनानघुलले प्रतियोगिताको लागि डेढ महिनाको तयारी गरेको बताए । उनले यो समयमा १० दिन चीनमा केही मैत्रीपूर्ण खेल खेलिएको र यही टोलीले उत्तर कोरिया, मेक्सिका र चीनसँग तीन अन्तर्राष्ट्रिय खेल खेलेको बताए । उनले नेपाल र थाइल्यान्डबीचको टिममा बराबरीकै रहेको बताए ।

‘हामीले नेपालको खेल बुझेका छैनौं । हामी आयोजकको नाताले दोस्रो चरणका प्रवेश गरिसकेका छौं । यो हाम्रो लागि दोस्रो चरणको तयारीका लागि हुनेछ,’ प्रशिक्षक अरुणको प्रि–म्याच पत्रकार सम्मेलनमा भने, ‘तयारीकै लागि भएपनि हामी समूहको तीनै खेलमा शतप्रतिशत जित निकाल्दै च्याम्पियन बन्ने लक्ष्य हुनेछ ।’

नेपाली टोलीका कप्तान सरु लिम्बुले बलियो थाइल्यान्डविरुद्ध सावधानीपूर्वक खेल्ने बताइन् । ‘हाम्रो लक्ष्य जित नै हो । हामी प्रशिक्षकको सल्लाह र रणनीतिमा मैदान उत्रनेछौं । मलाई विश्वास छ कि मेरो टिमले थाइल्यान्डलाई पराजित गर्नेछ,’ कप्तान सरुले भनिन् ।

नेपाली टोलीका सहायक प्रशिक्षक श्री प्रकाश वैद्यका अनुसार नेपाली टोलीले आज साँझ करिव २ घन्टा सामान्य प्रशिक्षण गर्नेछ ।