म्युनिख (एजेन्सी) – युइएफए च्याम्पियन्स लिग फुटबलमा जर्मन क्लब बायर्न म्युनिखले शानदार जित निकालेको छ । लिग अन्तर्गत मंगलबार राति भएको खेलमा बायर्नले पोर्चुगिज क्लब बेन्फिकामाथि ५–१ को शानदार जित निकालेको हो ।

बयर्नको फराकिलो जितमा आर्जेन रोवेन र रोवर्ट लेवान्डोस्कीले समान २ गोल गर्दा फ्रान्क रिवेरीले एक गोल थपे । बेन्फिकाका जेड्सन फर्नान्डिजले एक गोल फर्काए ।

घरेलु मैदान अालिअान्ज एरिनामा एकपक्षीय बनेको खेलमा बायर्नले खेलको १३औं मिनेटमा आर्जेन रोवेनको गोलबाट अग्रता बनाएको थियो । ३०औं मिनेटमा रोवेनले अर्काे गोल थप्दै अग्रता दोब्बर पारेको थियो । ३६औं मिनेटमा रोवर्ट लेवान्डोस्कीले जासुवा किम्मिचको पासमा गोल गरेपछि बायर्नले पहिलो हाफमै ३–० को आरामदायी अग्रता बनाएको थियो ।

दोस्रो हाफको शुरुमै बेन्फिाकाका जेड्सन फर्नान्डिजले गोल गर्दै खेललाई ३–१ को स्थितिमा ल्याएको थियो । तर, एक गोल खाएपनि बायर्नले थप दुई गोल गर्न सफल भयो । ५१औं मिनेटमा रोवर्ट लेवान्डोस्कीले गोल गरेपछि खेल ४–१ को अवस्थामा पुर्याए । ७६औं मिनेटमा फ्रान्क रिवेरीको गोल गरेपछि बायर्नले बेन्फिकामाथि ५–१ को शानदार जित निकाल्यो ।

जितपछि बायर्न समूह ‘ई’ को विजेताको रुपमा प्रि–क्वाटरफाइनलमा प्रवेश गरेको छ । बायर्नले ५ खेलबाट १३ अंक जोड्दै समूह विजेता बनेको हो । बायर्नसँगको हारसँगै बेन्फिका समूह चरणबाटै बाहिरिएको छ ।

यही समूहको अर्काे खेलमा आयाक्सले एइके एथेन्सलाई २–० ले पराजित गर्दै प्रि–क्वाटरफाइनलमा प्रवेश गरेको छ ।