काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत मंगलबारको पहिलो खेलमा नेपाल एपीएफ क्लबले न्यू रोड टिम (एनआरटी) लाई २-१ ले पराजित गरेको छ । एपीएफको जितमा म्यान अफ द म्याच युवराज खड्का र सुदिप सिख्राकारले १-१ गोल गरे ।

एपीएफले खेलको तेस्रो मिनेटमा नै अग्रता लिएको थियो । दायाँ विङबाट श्याम नेपालीले दिएको लो क्रसलाई पेनाल्टी क्षेत्रभित्र अनमार्क रहेका युवराजले सहजै गोल गरे । एपीएफको अग्रता लामो समय भने टिकेन । १५ औं मिनेटमा राजेश परियारले बराबरी गोल फर्काए । कप्तान प्रवीन सैंजुले दिएको लामो पासलाई उनले पहिलो टचमा नै गोलरक्षकलाई बिट गर्दै गोल गरेका थिए ।

राजेश परियार (एनआरटी, हरियो) र राजन गुरुङ

दोस्रो हाफमा दुवै टोलीले सुरुवाती मिनेटमा अवार गुमाए । राजेशको प्रहारलाई एपीएफको गोलरक्षक अमृत चौधरीले सहजै रोक्दा एपीएफका युवराज खड्काको शक्तिशाली प्रहारलाई गोलरक्षक अजित प्रजापतिले उत्कृष्ट ढंगले बचाए । एपीएफले ७२ औं मिनेटमा पेनाल्टीको मौका पायो । वैकल्पिक खेलाडी असिम गुरुङले पेनाल्टी क्षेत्रभित्र युवराज खड्कालाई लडाएपछि रेफ्रीले पेनाल्टी दिएका थिए । सुदीप सिख्राकारले पेनाल्टीमा कुनै गल्ती एपीएफले अग्रता दिलाए ।

सुशील लामा (एनआरटी, हरियो) र श्याम नेपाली (एपीएफ)

यस जितसँगै एपीएफले अंक तालिकामा ६ खेलमा २ जित, १ बराबरी र ३ हारसँगै ७ अंक जोडेको छ । एनआरटी भने लगातार पाँचौ हारसँगै १ अंक बोकेर अंक तालिकाको पुछारमा रहेको छ ।

गोल गरेपछि एपीएफका खेलाडी