काठमाडौं (हाम्रो खेलकुद)– व्यावसायिक खेल जीवनमा सफलताको एकपछि अर्को सिढी चडिरहेका नेपाली राष्ट्रिय फुटबल टोलीका नम्बर एक गोलकिपर किरण चेम्जोङ बुधबार स्वदेश आइपुग्दैछन् ।

टिसी स्पोर्टस क्लबलाई माल्दिभ्सको फुटबलको शीर्ष डिभिजन धिवेही प्रिमियर लिग च्याम्पियन बनाउन महत्वपूर्ण भूमिका खेलका किरण त्यसपछि स्वदेश फर्कन लागेका हुन् ।

५ दिनअघि सकिएको माल्दिभ्स लिगमा किरण उत्कृष्ट गोलकिपर समेत चुनिए थिए । उनी दुई महिनाभन्दा केहि लामो समयपछि स्वदेश फर्कन लागेका हुन् ।

‘लिग जित्नु अनि आफु उत्कृष्ट गोलकिपर चुनिनु मेरो लागि सुनमा सुगन्ध हो,’ किरणले हाम्रो खेलकुदसँग भने,‘ यसले आउने दिनमा अझै राम्रो गर्ने प्रेरणा मिलेको छ । मैले खेल जीवनकै उत्कृष्ट प्रदर्शन यो सिजन गरेको छु ।’

किरणको टोलीले लिगको १६ खेलमा १३ जित, १ बराबर र २ हारसहित ४० अंक जोड्दै लिग उपाधि जितेको थियो । किरणको टोलीले लिग अवधिभर खेलेका १६ खेल मध्य ११ खेलमा क्लिन सिट राख्न सफल भएका थिए । उनले जम्मा ५ खेलमा मात्र गोल खाए । किरणले यसै प्रदर्शनलाई आधार मानेर सर्वोत्कृष्ट गोलरक्षकको उपाधि पनि हात पारे ।

किरण गतवर्ष मिन्नरेभा पन्जाबबाट खेल्दै भारतको आई-लिग उपाधि पनि जितेका थिए । नेपालमा हुँदा रुस्लान थ्री स्टारबाट राष्ट्रिय लिग जितेपछि विदेश लागेका किरणले टिसी स्पोर्टसबाटै वर्षअघि बंगलादेशमा सम्पन्न शेख कमल अन्तर्राष्ट्रिय फुटबल प्रतियोगिताको उपाधि पनि जितेका थिए ।

सन् २०१६ किरणले राष्ट्रिय टोलीलाई एएफसी सोलिडारिटी कप जिताउन पनि महत्त्वपूर्ण भूमिका निर्वाह गरेका थिए । उनले सेमिफाइनलमा ३ पेनाल्टी रोकेपछि लाअोसलाई टाइब्रेकरमा ३-० ले पराजित गर्दै नेपाल फाइनल पुगेको थियो । नेपालले फाइनलमा मकाउलाई १-० ले हराउँदै उपाधि जितेको थियो ।