अग्रता कायम राख्ने मनाङको लक्ष्य

काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत बुधबार तीन खेल हुँदैछन् । एन्फा कम्प्लेक्समा दुई खेल हुँदा एपीएफ रंगशालामा एक खेल हुनेछ ।

लिग तालिकाको शीर्ष स्थानमा रहेको मनाङ मर्स्याङदीले ११ बजे एन्फा कम्प्लेक्समा हुने खेलमा जावलाखेल युवा क्लबको सामना गर्नेछ । मनाङले लिगको पाँचौ चरणसम्मआइपुग्दा शत प्रतिशत जित नतिजा निकालेको छ । यता जावलाखेलले पछिल्लो खेलमा ब्रिगेड ब्वाइजलाई १-० ले पराजित गर्दै लिगमा पहिलो जित निकालेको थियो ।

मनाङले लिग तालिकामा अग्रता बढाउने सम्भावना जीवित राख्न यस खेलमा जित दर्ता गर्नेपर्ने अवस्था छ । संकटाको समान १५ अंक छ भने आर्मी ५ खेलमा १३ र रुस्लान थ्री स्टार पनि ५ खेलमा १२ अंक लिएर बसेका छन् । मनाङले अंक गुमाएको अवस्थामा शीर्ष स्थानबाट तल झर्ने सम्भावना रहनेछ ।

जावलाखेलको लागि भने पछिल्लो केहि दिन सुखद रहयो । पहिलो जित दर्ता गरेपछि ब्रिगेड ब्वाइजलाई उछिन्दै जावलाखेल पुछारको तीन स्थानबाट माथि उक्लिएको छ । पहिलो जितको सिलसिलालाई कायम राख्ने लक्ष्यसहित जावलाखेल उत्रनेछ ।