काठमाडौं (हाम्रो खेलकुद) – अन्जन विष्टले निर्णायक गोल गरेपछि पल्सर सहिद स्मारक ए डिभिजन लिग अन्तर्गत बुधबारको खेलमा मनाङ मर्स्याङदी क्लबले जावलाखेल युवा क्लबलाई १-० ले पराजित गरेको छ । निकै प्रतिस्पर्धात्मक खेलमा अन्जनले दोस्रो हाफमा गरेको पेनाल्टी गोल निर्णायक बन्यो ।

पहिलो हाफमा मनाङले लगातार आक्रमण बुनेपनि जावलाखेलका गोलरक्षक टिकेन्द्र थापा लगातार बाधक बने । सातौं मिनेटमा कप्तान विशाल राईको फ्रिकिकमा गोलरक्षक टिकेन्द्रले पन्च गरेको बलमा अन्जनको प्रहार पुन: उनकै हातमा गयो । लगत्तै आडेलाजा सोमिडेको प्रहारलाई पनि उनले विफल पारे ।

खेलको १५ औं मिनेटमा विशाल राईले करिब ३० यार्ड टाढाबाट प्रहार गरेको फ्रिकिक टिकेन्द्रको हातमा लाग्दै क्रसबारमा लागेर फर्किएको थियो । त्यसपछि पनि मनाङको आक्रमणलाई टिकेन्द्रले रोक्दा पहिलो हाफ गोलरहित बराबरीमा टुंगिएको थियो ।

दोस्रो हाफको ६२ औं मिनेटमा मनाङले सुरुवाती अग्रता लियो । अन्जन विष्टले पेनाल्टीमा गोल गर्दै लिगको व्यक्तिगत पाँचौ गोल गरे । डिफेन्डर अडामा डुम्बियाले ओलावाले आफिजलाई ६ यार्ड बक्सभित्र लडाएपछि मनाङले पेनाल्टी पाएको थियो ।

८२ औं मिनेटमा कमल श्रेष्ठको क्रसमा ओलावाले आफिजले ६ यार्ड बक्सभित्रबाट खाली पोस्टमा फ्री हेडरलाई पोस्टको दिशा दिन सकेनन् । गोलरक्षक बिट भइसकेको अवस्थामा अनमार्क आफिजको डाइभीङ हेडर आकासिएको थियो । लगत्तै आफिजको पासमा अन्जनको प्रहार पनि पोस्टभन्दा बाहिर गयो ।

इन्युरी समयको तेस्रो मिनेटमा जावलाखेलले बराबरी गर्ने सुवर्ण अवसर खेर फाल्यो । सुशील यादवको हेडरलाई मनाङका गोलरक्षक विशाल श्रेष्ठले उत्कृष्ट बचाउ गरे । रिबाउन्ड बलमा जावलाखेलका अरुज सिंहले बललाई पोस्टको दिशामा प्रहार गर्न सकेनन् । गोलरक्षक विशाल बचाउ गर्ने क्रममा आँखामा चोट बोक्दै मैदान छाडेका थिए ।

इन्ज्युरी समयको आठौँ मिनेटमा जावलाखेलका लावल ओलाकनले २५ यार्ड टाढाबाट फ्रिकिक प्रहार पोस्टमा लाग्दै वैकल्पिक गोलरक्षक अशोक बराललाई लाग्दै पोस्टको दिशाबाट बाहिरिएको थियो ।

यस जितसँगै मनाङ लगातार छैटौं जित दर्ता गर्दै १८ अंकसहित लिग तालिकाको शीर्ष स्थानमा उक्लिएको छ । मनाङले दोस्रो स्थानको संकटालाई ३ अंकले पछाडी पारेको छ । जावलाखेल भने ६ खेलमा १ जित, १ बराबर र ४ हारसँगै ४ अंक जोड्न सफल भएको छ ।