एजेन्सी – स्पेनिस मिडफिल्डर इस्को र मार्को एसेन्सियोले २-२ गोल गरेपछि रियल म्याड्रिडले कोपा डेल रे अन्तर्गत बिहीबार मेलिलालाई ६-१ को फराकिलो अन्तरले पराजित गरेको छ । यससँगै रियल समग्रमा १०-१ को जित दर्ता गर्दै अन्तिम १६ मा स्थान बनाउँदा सफल भयो ।

रियलको जितमा मिडफिल्डर मार्को एसेन्सियोले उत्कृष्ट प्रदर्शन गरे । उनले टोलीको जितमा सुरुवाती दुई गोल गर्नुका साथै दुई असिस्ट पनि प्रदान गरे । उनीसँगै अर्का मिडफिल्डर इस्कोले २ गोल गर्दा भिनिसियस जुनियर र जाभी सान्चेजले पनि १-१ गोल गरे ।

पहिलो लेगमा फराकिलो जित दर्ता गरेकाले प्रशिक्षक सान्टियागो सोलारीले यस खेलमा दोस्रो रोजाइका खेलाडी उतारेका थिए । गोलरक्षक केलर नाभासले सुरुवाती रोजाइमा मौका पाउँदा डिफेन्समा जेसस भालेहो र जाभी सान्चेजले खेले । मिडफिल्डमा फेडेरिको भालभेर्डे तथा अाक्रमणमा मारियानो डियाज र भिनिसियसले मौका पाए । ड्यानी कार्भाजालले लेफ्ट ब्याकको भूमिका वहन गरे ।

खेलको सुरुवाती ३० मिनेटमा मेलिलाले पनि केहि गोल गर्ने अवसर बनाएको थियो । १८ वर्षीय फरवार्ड मोहमद मिजियनले दुई सुन्दर अवसर पाएपनि नाभास त्यसमा बाधक बने । मिजियनलाई रियल म्याड्रिडले यसअघि नै ट्रान्सफर विन्डोमा रियल ल्याउने तयारी गरेको बुझिएको छ ।

सुरुवाती ३० मिनेट रियललाई रोकेको मेलिलाले एसेन्सियोको सुरुवाती गोलपछि भने सम्हालिन सकेन । ३३ औं मिनेटमा एसेन्सियोले एकल प्रयासमै गोल गर्दै १-० को अग्रता दिलाए । लगत्तै भिनिसियस जुनियरले पेपे रोमेरोलाई छलाउँदै दिएको पासमा एसेन्सियोले रियलको अग्रता दोब्बर पारे ।

पहिलो हाफ सकिनसभन्दा ६ मिनेट अघि एसेन्सियोले नै रियललाई ३ गोलले अगाडि पुर्याउन मदत गरे । उनको चिप पासमा जाभी स्यान्चेजको प्रयास गोलमा परिणत भयो । स्यान्चेजले हावामै छँदा गरेको प्रयास गोलरक्षकको टाउको माथिबाट गोलमा परिणत भएको थियो ।

दोस्रो हाफको सुरुवातमै रियलले अग्रता बढायो । इस्कोले ४४ औं मिनेटमा शानदार सट प्रहार गर्दै गोलरक्षकलाई उक्त प्रहार बचाउने कुनै मौका दिएनन् । ७५ औं मिनेटमा भिनिसियसले पनि गोल गरे । एसेन्सियोले बनाएको मुभमा सुरुवाती सट गोलरक्षकले बचाएपनि रिबाउन्डमा भिनिसियसले गल्ति गरेनन् ।

मेलिलाले पनि ८० औं मिनेटमा पेनाल्टीको मौका पायो । जब जाभी सान्चेजले पेनाल्टी क्षेत्रभित्र लडाएपछि यासिन आफैंले पेनाल्टीलाई गोलमा परिणत गरे । ८३ औं मिनेटमा फ्रान गार्सियाको पासमा इस्कोले गोल गर्दै रियललाई सहज जित दिलाए ।