काठमाडौं (हाम्रो खेलकुद) – सिएमजी क्लब संकटाले शीर्ष स्थानमा रहेको सिग्नेचर मनाङ–मस्र्याङ्दी क्लबसँग अंक बराबरी गरेको छ । लिग अन्तरगत बिहिबार भएको खेलमा संकटाले हिमालयन शेर्पा क्लबलाई २–० ले पराजित गर्दै मनाङसँग अंक बराबरी गरेको हो ।
यद्दपि मनाङले एक खेल कम खेलेको छ । संकटाको ८ खेलबाट २१ अंक पुगेको छ । अपराजित रहेको मनाङको ७ खेलबाट २१ अंक छ । बिहिबार संकटालाई जिताउन सेडरिक अबा र दिपेश आलेमगरले गोल गरे ।
सातदोबाटो स्थित एन्फा कम्प्लेक्सको कृतिम मैदानमा भएको खेलमा संकटाले पहिलो हाफको ३ मिनेटको अन्तरमा २ गोल गरेको थियो । ११औं मिनेटमा सेडरिक अवाले मैदानको मध्यभागबाट एक्लैले बल अघि बढाउदै दुई रक्षकलाई बिट गर्दै गोल गरेका थिए ।
त्यसको तीन मिनेटपछि अमित तामाङको क्रस पासमा शेर्पाका डिफेन्डर निरज बस्नेतको कमजोर डिफेन्सको फाइदा दिपेश आलेमगरले सिक्स यार्ड बकसबाट गोल गरेका थिए । २ गोलले पछि परेपछि शेर्पाले संकटालाई दवावमा राखेको थियो । २५औं मिनेटमा विश्वास श्रेष्ठको फ्रिकिक संकटाका गोलरक्षक राजाबाबु थापाले पन्च गरेका बचाएका थिए ।
दोस्रो हाफमा पनि शेर्पाले संकटामाथि लगातार दवाव सिर्जना गर्यो । यता संकटाले अग्रता जोगाइराख्न सफल भयो । ५५औं मिनेटमा विश्वासकै फ्रिकिक गोलरक्षकले पञ्च गरेर बचाएका थिए । ७३औं मिनेटमा विश्वासकै फ्रिकिकलाई गोलरक्षकले बचाएका थिए । त्यसपछि थप गोल निस्कन नसक्दा संकटा २–० ले विजयी हुन सफल भयो ।
संकटासँगको हारपछि शेर्पाको शेर्पाको ८ खेलबाट ११ अंक रहेको छ । शेर्पा छैटौ स्थानमा छ । संकटाका टम्पी अर्नेस्ट खेलको म्यान अफ दि म्याच भए ।
