काठमाडौं (हाम्रो खेलकुद) – नेपाली टोलीले भुटानसँग खेल्दै विराटनगरमा फागनु/चैतमा आयोजना हुने साफ महिला फुटबल च्याम्पियनसिपको यात्रा सुरु गर्ने भएको छ ।
फाइलः तस्वीर
दक्षिण एसियाली फुटबल महासंघ (साफ) ले सार्वजनिक गरेको तालिका अनुसार नेपालले पहिलो खेल भुटानसँग फागुन २८ गते खेल्नेछ । समूह एमा नेपाल, भुटान, बंगलादेश र पाकिस्तान रहेका छन् । अर्को समूहमा भारत, माल्दिभ्स र श्रीलंका छन् ।
नेपालले दोस्रो खेल फागुन ३० गते पाकिस्तान र समूह चरणको अन्तिम खेल चैत २ गते बंगलादेशसँग खेल्नेछ । लिग कम नकआउट पछि समूहका शीर्ष २ टोली सेमिफाइनलमा पुग्नेछन् ।
विराटनगरको सहिद रंगशालामा हुने च्याम्प्यिनसिपको सेमिफाइनल चैत ६ गते र फाइनल चैत ८ गते हुनेछ । महिला साफ च्याम्प्यिनसिप नेपालले अहिले सम्म जित्न सकेको छैन ।
सन् २०१० देखि सुरु भएको साफ महिला च्याम्प्यिनसिपको पहिलो तीन संस्करणमा नेपाल फाइनल पुगेको थियो । २०१६ को चौथो संस्करणमा भने नेपाल सेमिफाइनल भन्दा अघि बढ्न सकेको छैन । यसअघिका चारै संस्करण भारतले जितेको थियो ।
