इलाम (हाम्रो खेलकुद) – इलाममा वर्षेनी आयोजना हुदै आएको माइभ्याली गोल्डकपको पाँचौ संस्करण स्थगित भएको छ । आयोजक माइभ्याली फुटबल क्लब र जिल्ला फुटबल संघ इलामले आइतबार पत्रकार सम्मेलन गरेर सेनाको असहयोगका कारण प्रतियोगिता गराउन नसकिने जानकारी गराउदै प्रतियोगिता स्थगित गरिनु परेको बताएकोछ ।

प्रतियागिता हुदै आएको सदरमुकामस्थित ठूलो टुँडिखेलमा नेपाली सेनाले काँडेतारले तारबार गरेपछि आगामी फागुनमा सञ्चालन गर्न लागिएको माइभ्याली गोल्डकप सञ्चालन गर्न नसकिने माइभ्याली फुटबल क्लवका अध्यक्ष धिरेन चेम्जोङले बताएका छन ।

अखिल नेपाल फुटबल संघ (एन्फा)ले आगामी माइभ्याली गोल्डकपको यो संस्करणलाई आफ्नो क्यालेन्डरमा फागुन २३ गतेदेखि चैत २ गतेसम्म गर्ने गरी स्वीकृति दिएकोे थियो । एन्फाले आयोजक माइभ्यालीलाई तोकिएको समयमा प्रतियोगिता सम्पन्न गराउन निर्देशन समेत दिइसकेको छ ।

खेलमैदान संरक्षण गर्न सहकार्य गर्न र तारबार नगर्न सेना प्रमुखसँग पटक–पटक आग्रह गर्दा तारबार नगर्ने आश्वासन दिएपनि त्यस विपरित कार्य भइरहेको भन्दै खेल खेलाउन नसकिने एन्फाका केन्द्रिय सदस्य निरोज खड्गीले बताए ।

माइभ्याली गोल्डकप ‘ए’ डिभिजनका फुटबल क्लबले खेल्दै आएको पूर्वी पहाडको ठूलो प्रतियोगिता हो । एन्फाले पनि यो वर्ष मोफसलको प्रतियोगिता गर्ने मध्ये आयोजक माइभ्यालीलाई देशभरको उत्कृष्ट तीनमा राखेको थियो ।

राणाकाल देखिनै खेल मैदानका रूपमा प्रयोग भइरहेको यो टुडिखेललाई नेपाली सेनाले आफ्नो स्वामित्तमा रहेको भन्दै सर्वसाधारणलाई प्रवेशमै रोक लगाउनुले जिल्लाकै खेल क्षेत्रलाई पाखा लगाएको गुनासो रहेको छ । ‘खेल मैदानलाई नरम बनाउन दुबो रोपेर खेल्न योग्य बनाएपनि अहिले सेनाले कब्जा जमाएपछि खेल खेलाउन पनि नसकिने गरि खेलमैदान बिग्रिएको छ ।

इलामस्थित पशुपति प्रसाद गणका प्रमुख असिमद्धीप गुरूङले तारबार गरेर अझ खेलमैदानको संरक्षण गरेको बताए । ‘हामीले कुनै पनि प्रतियोगिता रोक्ने काम गर्न खोजेका छैनौं, अझ एक हजार वाटको २४ वटा वत्ती राख्ने तयारी गर्दैछौं’ गुरूङले भने ‘माथिबाटै आफ्ना जमिनको सुरक्षा गर्न निर्देशन भए अनुसार यहाँ काम गरिएको हो, अब तारबार हटाउन माथिबाटै स्वीकृत लिनुपर्छ ।’ तर, प्रतियोगितानै रोक्ने भन्ने नभएको गुरूङको भनाइ छ ।