काठमाडौं (हाम्रो खेलकुद) – विभागीय टोली नेपाल एपीएफ क्लबले पल्सर सहिद स्मारक ए डिभिजन लिग अन्तर्गत मंगलबार घरेलु मैदानमा नेपाल पुलिस क्लबलाई ४-१ को फराकिलो अन्तरले पराजित गरेको छ । एपीएफको जितमा युवराज खड्काले २ गोल गरे ।

एपीएफले खेलको २० औं मिनेटमा सुरुवाती अग्रता लिएको थियो । सुदिप सिख्राकारको पासमा मिडफिल्डर राजेन्द्र रावलले पेनाल्टी क्षेत्रबाहिरबाट गरेको प्रहार गोलमा परिणत भएको थियो । २८ औं मिनेटमा हरी कार्कीले एपीएफको अग्रता दोब्बर पारे । श्याम नेपालीको क्रसमा हरीले ६ यार्ड बक्सभित्र अनमार्क रहेको अवस्थामा फस्ट टचमै गोल गरेका थिए ।

पहिलो हाफको २ मिनेट समय बाँकी हुँदा एपीएफका युवराज खड्काले घरेलु टोलीलाई ३-० को अग्रता दिलाए । सुदिप सिख्राकारले झन्डै २५ यार्ड टाढाबाट प्रहार गरेको फ्रिकिकमा युवराजले हेडर मार्फत गोल गरेका थिए । पहिलो हाफको इन्ज्युरी समयको पहिलो मिनेटमा नै पुलिसले अग्रता भने घटायो । रवी पासवानको क्रसमा तेज तामाङको हेडरलाई अजित भण्डारीले गोललाइन नजिकैबाट सहजै गोल गरे ।

दोस्रो हाफको ८५ औं मिनेटमा एपीएफले पुन: ३ गोलको अग्रता कायम गर्यो । श्याम नेपालीको सुन्दर पासलाई पेनाल्टी क्षेत्रभित्र युवराज खड्काले नियन्त्रणमा लिंदै गोलमा परिणत गरे । यस जितसँगै एपीएफले शीर्ष ६ मा पर्ने सम्भावनालाई बलियो बनाएको छ ।

एपीएफले पुलिसलाई अंक तालिकामा पनि उछिनेको छ । एपीएफले १२ खेलमा ६ जित र २ बराबरीसँगै २० अंक जोडेको छ । पुलिसले १२ खेलमा ५ जित र २ ३ बराबरी खेल्दै १८ अंक मात्र जोडेको छ ।

अंक तालिका :