दिपक बोहोरा, पाँचथर

फिदिममा जारी सुरु दशौं रुस्लान फाल्गुनन्द गोल्डकपमा झापा ११ ले विभागीय टोली नेपाल एपीएफ क्लबलाई ३–१ ले हराउँदै उपाधि नजिक पुगेको छ । सोमबार झापाको जितमा कार्ण लिम्बुले दुई र दिलेन लोक्तानले एक गोल गरे ।

जुनियर खेलाडीको बाहुल्यता रहेको एपीएफ टोली पहिलो खेलमै पराजित हुन पुग्यो । खेलमा २३ औं मिनेटमा देवेन्द्र तामाङको पासमा कर्ण लिम्बुले गोल गर्दै झापालाई सुरुवाती अग्रता दिलाएका थिए । ३८ औं मिनेटमा एपिएफका लागी मनिष लामाले बराबरी गोल फर्काए । मनिसले कुमार डंगोलको पासमा गोल गरेका थिए ।

खेलको ३८ औं मिनेटमा दिलेन लोक्तानले गोल गर्दै झापाको अग्रता पुन: स्थापना गरे । ८५ औं मिनेटमा दिलेनको क्रसमा कर्णले व्यक्तिगत दोस्रो गोल गर्दै झापाको अग्रता दोब्बर पारे । यस जितसँगै झापा प्रतियोगिताको सेमिफाइनलमा पुगेको छ ।

पहिलो हाफमा निकै दबाबमा रहेको एपिएफले दोस्रो हाफमा सुधारिएको प्रर्दशन गरेपनि गोल खान पुगेको थियो । झापाका फरवार्ड कर्णले पाएका अन्य अवसर चुकाउँदा ह्याट्रिक गर्न सकेनन् । पहिलो हाफमा झापाका गोलरक्षक मनोज प्रधानले केहि उत्कृष्ट बचाउ गरेका थिए । खेलमा दुई गोल गरेका झापाका कर्ण लिम्बु म्यान अफ दि म्याच बन्दै दश हजार रुपैयाँ प्राप्त गरे ।

खेलाडीहरुको प्रर्दशन राम्रो रहे पनि स्कोर गर्न नसक्दा पराजित हुन परेको एपिएफका प्रशिक्षक सुदिप श्रेष्ठले बताए । खेल मैदानको राम्रो अनुभव र एपीएफ आफुहरुको स्तरको नभएकाले सहज जित हात पारेको झापाका प्रशिक्षक प्रवेश कटुवालले बताए ।

प्रतियोगितामा मोफसलका चर्चित क्लबहरु र ए डिभिजन सहित दश टिमको सहभागीता रहेको छ । पूर्वकै प्रतिष्ठित फुटबल प्रतियोगितामध्येको फाल्गुनन्द गोल्डकपको दशौं संस्करणको विजेताले उपाधि सहित नगद चार लाख प्राप्त गर्ने छ ।

फाल्गुनन्द गोल्डकपमा मंगलबार हुने खेल :
एनएमबि फिदिम सपोर्टिङ क्लब विरुद्ध त्रिभुबन आर्मी क्लब